Deputat ilk müəllimini ziyarət etdi - FOTO
“Bu günlərdə Həcc ziyarətinə getməyi planlaşdırmışdım. Texniki səbəblərdən getməyi təxirə saldım. Və başqa bir ziyarət duyğusu ilə bilet alıb Naxçıvana uçdum”.
Rakus.az xəbər verir ki, bunu millət vəkili Fazil Mustafa bildirib.
Qeyd edib ki, 1972-1974-cü ildə ibtidai sinifdə dərs demiş, əlifbanı öyrtəmiş, bilik dünyasına gözümü açmış ilk müəllimim Məsmə xanım Hacıyevanı ziyarət etməyə gəldim. Allahın hikmətinə bax, Həcc ziyarətinə yetişəcək qədər anlamlı bir ziyarət nəsib etdi bizə. 45 ildir görüşmədiyim müəllimimlə görüşün duyğusunu izah etməyin nə qədər çətin olduğunu anlayıram. Telefonla hər zaman arayırdım, görüşmək isə nəsib olmamışdı. O təkcə ilk müəllim deyildi, həm də müəllimliyə bizim sinifdən başlamışdı. 45 il Naxçıvan şəhəri Eynalı Sultanov adına 7 saylı orta məktəbdə bu şərəfli peşəni davam etdirmişdi. 69 yaşlı müəllimim indi təqaüddə də olsa, sinifdən ayrılmanın nə dərəcədə ağır olduğunu üzünün çöhrəsindən sezə bilirsən. Ancaq mənim qədər, bəlkə də məndən də çox sevinən, duyğulanan bir gözəl insan, bir dəyərli öyrətmən obrazı bir daha mənə anlatdı ki, müəllimdən böyük dəyər yoxdur cəmiyyətdə, onu baş tacı etmədikcə, sıxıntılardan, geriçilikdən qurtulmamız çox-çox çətin olacaq. Xeyli dərdləşdik, xatirələrə vardıq.
Millət vəkili görüşə ailəsi ilə getdiyinin üstünlüklərinə də toxunub: “Ailəmi də görüşə aparmışdım ki, onlar da müəllim-şagird sevgisinin aurasında özlərini görə bilsinlər. Əllərindən öpürəm ilk müəllimim! Sənin üzərimdə haqqın bəlkə də ata-anamın haqqın qədərdir. Allahın köməyi ilə haqqını doğrultmağa çalışacağam”.
