DK-nın sədri mətbuat konfransı keçirdi
Azərbaycanda qadın sahibkarların sayı artaraq 186 min 390 nəfərə çatıb.
Rakus.az xəbər verir ki, bu barədə Ailə, Qadın və Uşaq Problemləri üzrə Dövlət Komitəsinin sədri Hicran Hüseynova noyabrın 22-də Yeni Azərbaycan Partiyasının qərargahında keçirdiyi mətbuat konfransında bildirib.
Komitə sədri deyib ki, 2012-ci ildə bu rəqəm 73 min 469 olub. Bu gün Azərbaycanda qadınların sahibkarlıqla məşğul olmaları üçün bütün imkanlar var. Kənd yerlərində qadınların fəallığının artırılması istiqamətində işlər gedir.
Hicran Hüseynova eləcə də uşaqpulu məsələsinə münasibət bildirib. O deyib ki, son 2 ildə dövlət başçısının təşəbbüsü ilə sosial məsələlərə böyük vəsait ayrılıb.
Dövlət Komitəsinin sədri qeyd edib ki, hələ də bir çox qadınlar işləmir: “Bir çox ölkələr evdar qadınların əməyini daha yüksək qiymətləndirmək üçün xüsusi vəsait ayırır. Biz hazırda bu məsələni qaldırmışıq. Yəni, uşaqları böyüdən qadınlara dəstək verilsə, bu, ailəyə də dəstək olar. Biz hazırda bu istiqamətdə çalışırıq”.
Komitə sədri erkən nikahlarla bağlı bildirib ki, “Bir çox insanlar qanuna hörmətlə yanaşmır. Qanunda qızların nikah yaşı göstərilib. Biz düşünürük ki, hüquq-mühafizə orqanları bu sahədə öz işini gücləndirməlidir. Ona görə də Dövlət Komitəsi olaraq respublika üzrə monitorinq qrupları yaratdıq. Profilaktiki işlər güclü olsa, bəlkə də o işlərin qarşısını ala bilərik. Təəssüf ki, hansısa hadisə olanda onu araşdırmağa, səbəbləri ilə maraqlanmağa başlayırıq. Tutaq ki, rayonda hansısa toy olanda, hamı bəy və gəlinin neçə yaşı olduğunu bilir. Ona görə də mən rayonlarda insanlarla görüşdə, qəbulda bu məsələləri qeyd edirəm. Məktəbdə çalışan müəllimlər hələ də erkən nikahlarla bağlı problemi dərk etmirlər. Ona görə də belə ailələrlə iş aparılır”.
O bildirib ki, “Azərbaycanda 18 yaşına qədər nikaha girən qızların sayı ilə bağlı ən yüksək göstərici 2011-ci ildə qeydə alınıb: 5138 nəfər. 2018-ci ildə bu göstərici 338 olub. Əvvəl 15-17 yaşında ana olan qızların sayı 4392 nəfər idisə , 2018-ci ildə bu göstərici 2129 nəfərdir.”
