Dondar Quşçu kəndi ərazisinə 1 mərmi düşüb- ANAMA
Ərazilərin Minalardan Təmizlənməsi üzrə Milli Agentliyə (ANAMA) Daxili İşlər Nazirliyinin (DİN) “102 Xidmətindən Tovuz rayonu, Dondar Quşçu kəndi ərazisinə 1 ədəd mərminin düşməsi barədə məlumat daxil olub.
Rakus.az xəbər verir ki, ANAMA-nın məlumatına görə, agentliyin xüsusi mobil çevik əməliyyat qrupu və DİN-in Tovuz rayon Polis Şöbəsinin əməkdaşları təhlükəsizlik qaydalarını nəzərə alaraq iyulun 22-də həmin əraziyə göndərilib və birlikdə qeyd olunan ərazidə əkin sahəsinə baxış keçirilib.
Təhlükəsizliyi təmin etmək məqsədilə ərazi polislər tərəfindən mühasirəyə alınıb.
Agentliyin mütəxəssisləri tərəfindən aparılan təcili təxirəsalınmaz əməliyyat-axtarış tədbirləri nəticəsində Ermənistan silahlı qüvvələri tərəfindən atılmış və partlamamış 122 mm-lik top mərmisinin (OF-56-1) aşkar olunub.
Top mərmisinin partladıcısı (RQM-2) üzərində olduğuna görə iyulun 23-də yerində zərərsizləşdirilib.
Top mərmisinin ətrafında 50 kv.m əraziyə yerüstü, 5 kv.m əraziyə isə yeraltı baxış keçirilib, əlavə təhlükəli əşya və qurğu aşkarlanmayıb.
ANAMA-nın əməliyyat meneceri Mədət Məmmədov jurnalistlərə deyib ki, Azərbaycan Ərazilərinin Minalardan Təmizlənməsi üzrə Milli Agentliyi (ANAMA) Tovuz rayonun Dondar Quşçu, Ağdam, Yuxarı Öysüzlü, Əlibəyli kəndlərində təmizləmə işləri aparır: “Yerli əhali ilə gündəlik olaraq əlaqə saxlanılır”.
Onun sözlərinə görə, Daxili İşlər Nazirliyinin ″102″ Xidməti-Zəng mərkəzi sistemindən agentliyə daxil olan müraciətlər qeydə alınır və dərhal ərazilər yoxlanılır:
“Tovuzun Dondar Quşçu kəndində Ermənistan silahlı qüvvələri tərəfindən atılmış iki ədəd partlamamış 122mm-lik top mərmisi aşkarlanıb.122mm-lik top mərmisinin içində 4 kq 100 qrama qədər partlayıcı maddə olub. Hərbi sursat ANAMA-nın mütəxəsisləri tərəfindən zərərsizləşdirilib. Hərbi sursatlardan biri yaşayış məntəqəsinə düşmüşdü. Həmin sursat agentliyin mütəxəsisləri tərəfindən zərərsizləşdirilərək ərazidən uzaqlaşdırılıb və məhv edilib. Eyni zamanda, Tovuz rayonun Yuxarı Öysüzlü kəndində isə 100mm top mərmisi aşkarlanıb. Həmin mərmilərin partladıcısı üzərində olmasına baxmayaraq işə düşməyib”.
Xatırladaq ki, iyulun 12-də günorta saatlarından başlayaraq Azərbaycan-Ermənistan dövlət sərhədinin Tovuz rayonu ərazisindəki atəşkəs rejimini kobud şəkildə pozan Ermənistan silahlı qüvvələrinin bölmələri artilleriya qurğularından Azərbaycan mövqelərini atəşə tutublar. Hücum nəticəsində Azərbaycan Ordusunun hərbçiləri, mülki əhali həlak olub, yaralananlar var. Ermənistanın təxribatı nəticəsində mülki əhaliyə xeyli sayda ziyan dəyib. Hazırda mülki əhaliyə dəyən ziyanın məbləği müəyyənləşdirilir.
