“DOST süfrəsi” kampaniyası başa çatır
Ramazan ayının başa çatması ilə əlaqədar bu müqəddəs ay boyu davam edən “DOST süfrəsi” aksiyasına da yekun vurulur.
Rakus.az xəbər verir ki, Əmək və Əhalinin Sosial Müdafiəsi Nazirliyinin ictimaiyyətlə əlaqələr və kommunikasiya şöbəsindən verilən xəbərə görə, nazirlik tərəfindən Novruz bayramı ilə əlaqədar mart ayında keçirilən “DOST xonçası” kampaniyasının davamı olaraq Ramazan ayının gəlişi ilə bağlı “DOST süfrəsi” aksiyası başladılmışdı. Aksiya bu müqəddəs ayın yüksək dəyərlərindən biri kimi xüsusən həssas qruplardan olanlarla iftar süfrəsini bölüşməyi nəzərdə tuturdu.
“DOST xonçası” kimi “DOST süfrəsi” də elə ilk gündən maraqla qarşılanıb. Aksiyaya qoşulan bir çox dövlət qurumları, təşkilatlar, tanınmış şəxslər həssas qruplardan olanlarla iftar süfrəsini bölüşdülər.
Onlar bu barədə facebook səhifəsində postlarını #dostsüfrəsi “hashtag”ı altında paylaşıblar.
Bu aksiya iftar süfrələri ətrafında mənəvi birlik, həmrəylik duyğularının, qarşılıqlı hörmət və mehribanlıq hisslərinin güclənməsinə, həm də insanlar arasında yeni səmimi dostluq tellərinin qurulmasına öz töhfəsini vermiş oldu.
