“Dostlarla birgə” – şəhid jurnalistlərin qorxmazlıq dastanı - VİDEO
GünAzTV – Güney Azərbaycan Televiziyasının “Dostlarla birgə” verilişi 44 günlük Vətən müharibəsindən sonra peşə fəaliyyətlərini yerinə yetirərkən şəhidlik zirvəsinə ucalımış Məhərrəm İbrahimovun və Sirac Abışovun həyat hekayəsinə həsr olunub.
İyulun 22-də – Milli Mətbuat Günü efirə gedən verilişin qonağı şəhidlərin qardaşları jurnalist Əsgər İbrahimov və rejissor Şirzad Səmədov olub.
Türkan Arazın aparıcılığı ilə 52 dəqiqə davam edən verilişdə şəhid həmkarlarının keçdiyi çətin və şərəfli yola nəzər salınıb, uzun müddət cəbhəboyu zonada ezamiyyətlərdə olan, təmas xəttində mətbuat nümayəndələri üçün təşkil olunan təlimlərdə iştirak edən, Aprel döyüşlərində, Tovuz döyüşlərində, Vətən müharibəsində ən qaynar nöqtələrdən xəbərlər, reportajlar hazırlayan Məhərrəm və Siracın hərbi jurnalist kimi topladığı zəngin təcrübələrindən söz açılıb.
Allah şəhidlərimizə rəhmət etsin, ruhları şad olsun!
Xatırladaq ki, 2021-ci il iyunun 4-də saat 11:00 radələrində xidməti vəzifələrinin icrası ilə əlaqədar işğaldan azad edilmiş Kəlbəcər rayonuna ezam olunmuş bir qrup jurnalisti aparan “KamAZ” markalı sərnişin avtomobilinin rayonun Susuzluq kəndi istiqamətində hərəkətdə olarkən tank əleyhinə minaya düşməsi nəticəsində üç nəfər – AZƏRTAC-ın müxbiri Məhərrəm İbrahimov, Azərbaycan Televiziyasının operatoru Sirac Abışov və Kəlbəcər Rayon İcra Hakimiyyəti başçısının Susuzluq kənd inzibati ərazi dairəsi üzrə nümayəndəsinin müavini Arif Əliyev həlak olublar.
Azərbaycan Prezidenti İlham Əliyevin Sərəncamı ilə Məhərrəm İbrahimov və Sirac Abışov ölümlərindən sonra 3-cü dərəcəli “Vətənə xidmətə görə” ordeni ilə təltif ediliblər.
Ətraflı GünAzTV-nin süjetində tanış ola bilərsiniz:
