Əfrahim Təhməzov: “20 Yanvarda sovet əsgərləri insanları vəhşicəsinə qətlə yetirirdilər”
“Qara Yanvar Azərbaycanın azadlığı uğrunda mübarizə aparan xalqımızın birlik, fəxr və şərəf günüdür. Həmin tarixi dövrdə oğul və qızlarımız milli azadlığımız uğrunda mübarizəyə qalxmışdır”.
Bu sözləri yanvarın 20-də Şəhidlər xiyabanını ziyarətə gələn Əfqanıstan müharibəsi veteranı, Azərbaycan və Rusiya Jurnalistlər birliklərinin üzvü, ehtiyatda olan ədliyyə polkovniki Əfrahim Təhməzov Rakus.az-a müsahibəsində deyib.
Ə.Təhməzov bildirib ki, keçmiş SSRİ-nin hərb maşınının həmin gün Azərbaycan xalqına qarşı törətdiyi bu qanlı cinayət bəşər tarixində qara səhifə olaraq qalacaq. Milli azadlığı, ölkəsinin ərazi bütövlüyü uğrunda mübarizəyə qalxmış dinc əhaliyə divan tutulması, yüzlərlə günahsız insanın qətlə yetirilməsi sovet rejiminin cinayətkar mahiyyətini bir daha nümayiş etdirdi. Dəhşətli 20 Yanvar gecəsində xalqımız özünün qəhrəmanlığını və azadlıq uğrunda mübarizə əzmini bir daha bütün dünyaya bəyan etdi.
Qanlı hadisələrin canlı şahidi olduğunu deyən Ə.Təhməzov vurğulayıb ki, 1990-cı il yanvarın 19-dan 20-nə keçən gecə sovet qoşunları Bakıda silahsız insanları gülləboran etdi: “Sovet əsgərləri həmin gecə tankları əliyalın əhalinin üstünə sürürdü, insanları vəhşicəsinə qətlə yetirirdilər. Uşaq, cavan, ahıl demədən, hamıya atəş açırdılar. Ölən və yaralananların sayı çox idi. Hətta mənim müəllimimi də vurmuşdular. Həmin vaxtı mən Bakı Dövlət Universitetində ikinci təhsilimi alırdım. 20 Yanvar hadisələri zamanı bir neçə yoldaşla bizdə küçədə idik. Biz yaralıların xəstəxanalara aparılmasına kömək etdik. Rus əsgərlərinin heç kimə rəhmi gəlmirdi. O gecə gördüklərim dəhşətli bir mənzərə idi. Həmin gün mənim yaddaşımdan heç bir vaxt silinməz”.
O, zaman ümummilli lider Heydər Əliyevin Azərbaycanın Moskvadakı nümayəndəliyinə gələrək başda Mixail Qorbaçov olmaqla, keçmiş sovet rəhbərliyinin Azərbaycanda törətdiyi hərbi siyasi cinayətin beynəlxalq aləmə çatdırılmasındakı tarixi xidmətlərindən danışan Ə.Təhməzov 20 Yanvar faciəsinə dövlət səviyyəsində siyasi-hüquqi qiymətin məhz Ulu Öndər Heydər Əliyevin siyasi hakimiyyətə qayıdışından sonra veridiyini söyləyib.
Ə.Təhməzov qeyd edib ki, bu il xalqımız 20 Yanvar hadisələrinin 30-cu ildönümünü qeyd edir, igid övladlarının fədakarlığını məhəbbətlə xatırlayır, onların əziz xatirəsini böyük ehtiramla yad edir. Şəhidlərimiz və Şəhidlər xiyabanı azadlığımızın, müstəqilliyimizin, milli iradəmizin simvolu kimi bundan sonrakı nəsillərə də bir qürur mənbəyi olacaq.
