“Elmi, diplomatik və ictimai fəaliyyətimiz yalnız dövlətimizə və xalqımıza xidmət üçündür” – Rizvan Nəbiyev - FOTO
Sentyabrın 1-nə təyin edilmiş Azərbaycan Respublikasının Milli Məclisinə növbədənkənar seçkilərdə 49 saylı Abşeron ikinci seçki dairəsindən deputatlığa bitərəf namizəd Rizvan Nəbiyev seçicilərlə görüşlərini davam etdirir.
Rakus.az xəbər verir ki, Rizvan Nəbiyev seçkiqabağı təşviqat çərçivəsində Abşeron rayonunda avqustun 29-da keçirdiyi görüşdə rayon ziyalıları, ictimaiyyət nümayəndələri, Birinci Qarabağ müharibəsi qaziləri, gənclər və tələbələr iştirak ediblər.
Ənənəvi olaraq, seçicilərini Seçki Platforması ilə tanış edən deputatlığa namizəd planlarından və hədəflərindən danışıb.
O, çıxışında seçicilərini özünün elmi və diplomatik fəaliyyəti barədə də məlumatlandırıb. R.Nəbiyev uzun illər Azərbaycanın Almaniyadakı səfirliyində çalışdığı dövrdə paralel olaraq Berlin Azad Universitetində pedoqoji fəaliyyətlə də məşğul olduğunu, digər universitetlərdə isə qonaq mühazirəçi kimi məruzələr etdiyini bildirib.
Həmin dövrdə elmi tədiqatlarını da davam etdirdiyini söyləyən R.Nəbiyev Azərbaycan həqiqətlərinin dünyaya çatdırılması istiqamətində, eləcə də Qarabağın tarixən Azərbaycanın ayrılmaz tərkib hissəsi olması ilə bağlı alman alimləri ilə birlikdə bir neçə kitabın hazırlandığını və nəşr etdirildiyini qeyd edib.
R.Nəbiyev həmin elmi yaradıcılıq nümunələrinin bu gün də Avropa kitabxanalarında saxlanıldığı və elmi işlər zamanı istifadə olunduğunu vurğulayıb.
Deputatlığa namizəd çıxışı zamanı gənclərin daha yüksək təhsilə yiyələnməsinin, bilik və savadlarının daha da artırılmasının vacibliyini qeyd edib.
Təhsil məsələlərinin təkcə Seçki Platformasında yer almadığını söyləyən namizəd bildirib ki, elm və təhsil qaçqınlıqdan diplomatiyayadək onun həyatında mühüm rol oynayıb.
“Qalib dövlət – xoşbəxt ailə” yanaşmasını rəhbər tutan R.Nəbiyev bildirib ki, milli dəyərlərimizin, eləcə də cəmiyyətdə qadınların və uşaqların hüquqlarının qorunması məsələsi onun üçün prioritetdir.
Şəhid ailələri və qazilərə ayrılan diqqət və qayğıdan danışan deputatlığa namizəd bunun dövlət siyasəti olduğunu xatırladıb.
R.Nəbiyev tədbirin yekununda seçicilərini dinləyib, onların təklif və müraciətləri əsasında fikir mübadiləsi aparılıb.
Seçicilər Rizvan Nəbiyevi Milli Məclisdə öz nümayəndəsi kimi görmək arzusunda olduqlarını və bunun üçün 1 sentyabrda ona səs verəcəklərini bildiriblər.
Xatırladaq ki, 2024-cü il sentyabrın 1-də Azərbaycan Respublıkası Milli Məclisinin VII çağırış deputatlarının seçilməsi üçün növbədənkənar parlament seçkiləri keçiriləcək. Majoritar seçki sistemi ilə keçirilən seçkilərdə Azərbaycan Milli Məclisinin 125 deputatının seçilməsi nəzərdə tutulub.
