Hərbi 24.09.2019 11:00

Elmir torpaq uğrunda şəhid oldu - FOTO - VİDEO

Ölçü

A+ A- A

Bu gün Goranboy rayonunun Əhmədabad kənd sakini Sərxan Zeynalovun doğmaları onun yurduna toplaşıb. Onunla yanaşı, həyat yoldaşı Nazilə xanım və qızı Şəfiqə əzizlərini göz yaşı içində qürurla qarşılayır. Çünki ailənin tək oğlu Elmir bu gün 25 yaşını şəhid məzarında qeyd edir…

Uşaqlıqdan torpaqlarımızın müdafiəsində dayanmaq arzusunda olan Elmir böyüdükcə bu ailənin də şəhid verdiyini anlayır. Əmisi İmanın şəhid olduğunu bildikdən sonra onun bu arzusu durmadan artır və qəlbində bu hissi özü ilə böyüdür. Məcburi hərbi xidmətini sərhəd qoşunlarında çəksə də uşaqlıq arzusunu unutmur və vətənə borcunu torpaqlarımızın müdafiəsində dayanmaqda görür. Çünki şəhidlərin və bu həyatda üzünü görmədiyi şəhid əmisinin məzarını hər ziyarət edərkən bu arzusunu reallaşdırmağa çalışır. Beləliklə də ordudan təxris olunan kimi könüllü surətdə yenidən ordu sıralarına yazılır və tərpaqlarımızın müdafiəsi üçün sərhəddə dayanır. Atəşkəsi durmadan pozan və vətənimizə tuşlanan düşmən atəşinin yerindəcə susdurulmasında xüsusi xidmətləri ilə seçilir. Kəndə gələn kimi isə əmisinin məzarını ziyarət edir, qəlbində onun ruhunu şad etdiyi üçün qürur duyur və sona qədər torpaqlarımızın müdafiəsində qalacağına söz verir.

Ailənin yeganə oğlu olan Elmir bu qeyrətli hərəkəti ilə doğmalarının sevimlisinə çevrilmişdi. Onu tanıyanların hər biri onun bu cəsarətindən ürəklə danışır.

Kəndə yolumuz 25 yaşlı şəhidin haqqında yazı hazırlamaq üçün düşdü. Evin qarşısında bizi zahirən qəmli olan atası Sərxan kişi qarşıladı. İlk kəlmədən isə onun böyük ürək sahibli məğrur bir kişi olduğunu gördük. Ata kimi şəhidin anası, bacısı, dostu və iş yoldaşı da Elmirin ibrətamiz və gənclərimizə nümunə olan ömür yolu, vətənə, torpağa bağlılığı, qeyrəti və cəsarəti haqqında ürəkdən danışdılar ( Onların fikirləri ilə videoda tanış ola bilərsiniz).

Evin böyük otağında Elmirin guşəsi düzəldilib. Forması, şəkilləri, medalı, fəxri fərmanları sıra ilə düzülüb. Telefonu isə ürək dağlayır. Günki anası ilə son danışığı bu telefonla olub. Atası, bacısı və doğmaları onun son səsini bu telefon vasitəsi ilə eşidib. İndi isə Elmir kimi telefon da şəhid olub. Nə ona zəng gəlir, nə də ondan zəng edilir… Halbuki ailə o telefon zənginin həsrətini 2016-cı ilin fevralın 12-dən çəkir.

Elmirin doğmaları ilə birlikdə onun məzarını ziyarət etmək üçün kənd qəbirstanlığına getdik. Məzara doğu irəliləyən valideynləri və bacısı kədərli və acız görünsə də qeyrətli oğul böyütdüklərinə görə qürurlu idilər. Çünki onların bu hərəkəti torpaqlarının bir hissəsi düşmən tapdağında olan vətənin hər bir ailəsi üçün nümunə olmalıdır. Qeyrətli oğul torpaq uğrunda şəhid olar.

Elmir də əmisi İman kimi eyni mövqedə və düşmənin eyni nöqtəyə atəşindən şəhidlik zirvəsinə ucalıb.

Bu gün 25 yaşını şəhid məzarında qeyd edən Elmir əmisinin taleyini yaşamaqla onunla yanaşı dəfn olunub. Bu da bir fədakarlıq nümunəsidir…

Zaman gələcək, illər ötəcək, nəsillər dəyişəcək. Tək dəyişməyən isə Elmirin mərdliyi, əmisinin qəhrəmanlığı olacaq. Gələcək nəsillər isə onların bu məğrurluğundan nümunə götürərək güclənəcək.