Elm və təhsil 07.09.2024 11:22

Bu il tələbə adını qazanan Ardanış gəncləri ilə görüş keçirilib - FOTO

Ölçü

A+ A- A

Göyçə mahalının Ardanış kəndinin bir qrup ziyalısı bu il tələbə adını qazanan Ardanış kökənli gənclərlə görüşüb.

Rakus.az xəbər verir ki, tələbə adını qazanan gənclərimizi və onlarla gəlmiş yaxınlarını salamlayan M.Ə.Rəsulzadə qəsəbəsinin bələdiyyə sədri, hüquqşünas Hümbət Hüseynov torpaqlarımızın azadlığı uğrunda gedən döyüşlərdə canlarını qurban vermiş şəhidlərimizin əziz xatirəsini bir dəqiqəlik sükutla yad etməyi təklif edib.

Şəhidlərin əziz xatirəsi yad olunduqdan sonra Azərbaycan Respublikasının dövlət himni səsləndirilib.

H.Hüseynov müəllim Ardanış kənd məktəbində gözəl bir adətin olmasından və hələ kənddə yaşayarkən hər il onlarla məzunlarımızın ali məktəblərə qəbulundan danışıb, bu ənənənin deportasiyadan sonra gənclərimizin də davam etdirməsini, artıq onların səsinin dünyanın ən qabaqcıl universitetlərdən gəlməsini xüsusi vurğulayıb: “Sağlam ruhlu gəncliyimizin uğurları hamımızın doğma yurdlarımıza qayıdışın zəmanətidir. Sizlər də bu yolda mübarizlərdən olmalısınız”.

Görüşdə çıxış edən ziyalılardan Vüqar Abduyev, Haqverdi İbrahimov, Əli Vəliyev, Yaşar Kərimov, Mahirə Qurbanova, Zəkiyyə Kərimova və başqaları çıxış edərək, gəncləri tələbə adı almaları münasibəti ilə təbrik etdilər və ata-babalarının ənənələrini davam etdirərək öz bilik, bacarıqları ilə ardanışlı adını hər yerdə uca tutmalarını tövsiyə ediblər. Onlar öz kənd məktəblərini, müəllimlərini həmişə yaxşı xatırladıqlarını və oranı Ardanış kənd akademiyası adlandırdıqlarını bildiriblər.

Xüsusi vurğulanıb ki, hətta 1977-ci il buraxılışında Ardanış kənd orta məktəbini bitirən bir sinifdən 5 nəfər məzun Bakı Dövlət Universitetində eyni qrupda oxuyub və bu qrup universitetdə “Ardanış” adı ilə tanınırdı: “İki halda isə 3 nəfər eyni sinifdən Aərbaycan Pedaqoji Universitetində eyni qrupda oxuyublar. Gənclərə həm ali məktəblərdə, həm də ictimai həyatda öz bilik və bacarıqları ilə fərqlənəcəklərinə inanırıq. Bu gün öz tarixi yurdlarımıza qayıtmaq üçün savadlı, bacarıqlı gənclərə ehtiyac daha çoxdur. Sizlər də bu yolda öz qabiliyyətinizi əsirgəməməlisiniz”.

Görüşdə iştirak edən “İrəvan komitəsi” İB-nin təşəbbüs qrupunun sədri Tofiq Həsənov da gəncləri təbrik edərək onlara uğurlar arzulayıb.

Tələbə adı qazanan gənclərdən Ələmdar İbrahimli, Aişə Kərimli, Nigar Qurbanova, Zeynəb Kərimova, Ayan Hüseynli, Həsən Axundlu, Araz Əsgərzadə, Alsu Nəbizadə, Aylin Əliyeva, Nihad Hümbətli, Nicat Kərimli, Nurcan Vəliyeva və başqaları çıxış edərək bu görüşü təşkil etdiklərinə görə ziyalılarımıza təşəkkür edib, hər yerdə bu tövsiyələri unutmayacaqlarını bildirdilər.