Ermənistan müxalifəti sirləri açır - FOTO - VİDEO
Ermənistanla Azərbaycan arasında delimitasiya prosesi sürətləndikcə erməni müxalifəti də etiraz aksiyalarını artırır. Müxalifətin önəmli simaları bu istiqamətdə avantürist, ağlasığmaz bəyanatlar səsləndirirlər. Hətta Göyçə və Zəngəzurun delimitasiya prosesi çərçivəsində Azərbaycana veriləcəyini deyənlər də var. Müxalifətin avanturist bəyanatlarının arxasında nə dayanır? Ermənistan müxalifəti ciddi şəkildə Göyçə mahalının bir hissəsinin və Zəngəzurda müəyyən ərazilərin Azərbaycana təhvil veriləcəyi iddiasını son günlər tez- tez dilə gətirir. Bu, baş nazir Nikol Paşinyanın xalq dəstəyini azaltmaq üçün edilən çıxışlardır, yoxsa həqiqət? Hazırkı delimitasiya prosesi sona qədər problemsiz, tam şəkildə yekunlaşacaqmı?
Rakus.az xəbər verir ki, Baku TV- nin departament rəhbəri Turan İbrahimov bu sualları jurnalist Həmid Həmidova və siyasi şərhçi Əziz Əlibəyliyə ünvanlayıb.
Jurnalist Həmid Həmidov deyib ki, erməni müxalifətinin hərəkətlərinə, dediklərinə əhəmiyyət vermək lazım deyil: “Artıq Ermənistan daxilində də onların nüfuzu qalmayıb. Sadəcə özlərini gündəmdə saxlamağa çalışırlar. Yaxşı bir atalar misalı var: it hürər, karvan keçər. Ermənistan müxalifəti də hazırda bu misaldakı it rolunu oynayır”.
Jurnalist, həmçinin xatırladıb ki, Azərbaycan işğalçı deyil: “Ermənistanın indiki ərazisi isə tarixi Azərbaycan torpaqlarıdır. Hər bir kəndində azərbaycanlılar yaşayıb. Bu gün isə rəsmi Bakı beynəlxalq hüquqa hörmətlə yanaşır. Azərbaycanın kimsənin torpağında gözü yoxdur. Əgər müdaxilələr olmasa, Azərbaycanla Ermənistan arasında delimitasiya prosesi problemsiz olacaq və tam şəkildə yekunlaşacaq”.
Siyasi şərhçi Əziz Əlibəyli isə bildirib ki, Azərbaycan Ermənistandan istədiyi bütün əraziləri ala bilər: “Bunun üçün həm de-fakto, həm də de-yure imkanlar var. Ermənistandakı etirazlar daha çox hakimiyyətlə kilsə arasında ziddiyyətlərin təzahürüdür. Müxalifət də Azərbaycanın qələbəsi qarşılığında addım atmağa məcburdur”.
