Əsgərlərimiz belə hərbi hissələrdə xidmət edir - FOTO

Atəşkəsin hökm sürdüyü müharibə şəraitində yaşayan xalqımız düşmənin mütəmadi hərbi təzyiqlərinə məruz qalır. Belə ki, ikitərəfli rəsmi atəşkəs rejiminin elan olunmasına baxmayaq düşmən gün ərzində dəfələrlə torpaqlarımızı atəşə tutsa da igid əsgərlərimiz tərəfindən yerindəcə susdurulur. Bu mənada müstəqil respublikamız bu gün Azərbaycan Ordusuna arxalanır. Bəs görəsən ordumuzun şəraiti necədir ?

Müdafiə naziri, general-polkovnik Zakir Həsənov ötən ay bir qrup media nümayəndəsi ilə keçirdiyi görüşdə ordumuzun real durumuna, döyüş qabiliyyətinə, hazırlığına, təlimlərinə real faktlarla aydınlıq gətirdi. Bildirdi ki, Respublika Prezidenti, Ali Baş Komandan İlham Əliyevin rəhbərliyi, qayğısı və köməkliyi sayəsində son illər orduda güclü islahatlar aparılmaqdadır. Çünki ordumuz dövlət başçısının göstərişlərinə hər an hazır olmalıdır.

Orduda həyata keçirilən bir sıra tədbirlərlə yanaşı yoxlamaların da davam etdirilməsi müsbət haldır. Müdafiə nazirinin göstərişi və şəxsən özünün də iştirakı ilə belə yoxlamaların aparılması dəyərləndirilməlidir.

Xalqımız tərəfindən orduya son dərəcə həssəslıqla yanaşıldığından demək olar ki, hər bir ordu xəbəri vacibliyi ilə seçilir. Bu mənada bir əsgər valideyni kimi N saylı hərbi hissədəki mövcud şəraitlə yerində tanış oldum.

Məlumat üçün bildirim ki, Səfərbərlik və Hərbi Xidmətə Çağırış üzrə Dövlət Xidməti tərəfindən orduya göndərilən çağırışçılar hərbi hissəyə daxil olan andan prosedur qaydalara uyğun olaraq ilkin surətdə tibbi müayinədən keçirlər.

Bundan sonra onlar birbaşa anbara gedərək hərbi geyimlərini götürüb yuyunma və soyunub-geyinmə otağıda üz tuturlar. Bölmələrə bölünən əsgərlər kazarmalarla tanışlıqdan sonra rejimə əsasən yeməkxanaya daxil olurlar. Bu andan demək olar ki, onların rəsmi əsgərlik həyatı başlayır. Şəraitlərinə gəlincə isə.. Bu barədə hərbi hissəyə fotoların gözü ilə baxmaq daha münasibdir. Təmizlik, qayda-qanun, şərait göz önündədir. Məhz bu səbəbdən də əsgərlərin çoxu hərbi hissəni uşaq bağçalarındakı şəraitlə eyniləşdirir. “Bura uşaq bağçasını xatırladır” deyimi əsgərlərin dilindən düşmür. Təbii ki, onlar bununla hərbi hissədə olan şəraiti nəzərdə tuturlar. Fotolar  isə hərbi hissənin real şəraitininin məntiqi göstəricisidir.

Yeməkxana tam müasir şəraitdədir, kazarmalar, hamam və tualetlər, təlim meydançaları, dərs və idman otaqları son dərəcə təmizdir.  Yeməklər aparılan islahatlara uyğun olaraq qadınlar tərəfindən hazırlanır. İdman otaqlarına xüsusi avadanlıqlar quraşdırılıb. Bir sözlə, belə şəraitdə əsgərin üzərinə yalnız bir vəzifə düşür: Hərbi sirləri, silah və texnikanı, döyüş sursatlarını mükəmməl öyrənməklə Vətənə layiqincə xidmət etmək.

Mikayıl Nərimanoğlu,
Baş redaktor, Əməkdar jurnalist