ETSN ermənilərin törətdiyi ekoloji terrorla bağlı məlumat yaydı
Ekologiya və Təbii Sərvətlər Nazirliyi müharibə və silahlı münaqişələr zamanı ətraf mühitin istismarının qarşısının alınması beynəlxalq günü ilə bağlı məlumat yayıb.
Rakus.az xəbər verir ki, ETSN-dən bildirilib ki, işğalçı Ermənistan təkcə xalqımıza qarşı deyil, eyni zamanda, təbiətimizə və təbii sərvətlərimizə qarşı da terror həyata keçirir:
“Təbii sərvətlərin talan olunması, ərazilərin yandırılması, su ehtiyatlarının çirkləndirilməsi, flora və faunanın məhvi erməni işğalçıları tərəfindən bu gün də davam etdirilir və regionun ekoloji durumuna böyük zərər vurulur.
İşğal altında olan ərazilərdə yerləşən su anbarlarından cəbhəboyu bölgələrdə yaşayan əhalinin istifadə etməsinə imkan verilmir və su anbarları vasitəsilə həyata keçirilən ekoloji terror yaxınlıqda məskunlaşan əhali üçün ciddi təhlükə yaradır.
Belə ki, suya tələbatın daha çox olduğu əkin-biçin mövsümündə su anbarlarının qarşısı kəsilərək, sudan istifadədə maneələr yaradılır, əksinə, suya ehtiyac olmayan yağışlı günlərdə isə anbarlardan böyük həcmdə suyun buraxılması ətraf rayonların təsərrüfatlarına ciddi ziyan vurur”.
“Uzun illər işğal altında olan Qarabağ ərazisində 2000-dən çox ali bitki növünə rast gəlinir ki, bu da Azərbaycan florasının 42 faizini təşkil edir. Bu növlərdən 70-i işğal olunmuş ərazilərdə rast gəlinən nadir növlər olub, “Qırmızı Kitab”a daxil edilib. Qarabağ ərazisində ümumilikdə 400-dən çox quru onurğalı növləri yayılıb, bunların 60-dan çoxu nadir və sayı azalmaq təhlükəsi altında olan fauna növləridir.
Ümumi sahəsi 43 min ha olan iki dövlət təbiət qoruğu, dörd dövlət təbiət yasaqlığı, 152 ədəd təbiət abidəsi – qədim ağaclar, beş ədəd geoloji-paleontoloji obyekt, hündürlüyü 45 metr, diametri 6-8 metrədək, yaşı 120 ildən 2000 ilədək olan pasportlaşdırılmış 145 Şərq çinarı və digər təbiət abidələri uzun illər ağır və misli görünməmiş talanla üz-üzə qalıb”, – qeyd edilib.
