Fərqli reseptlərlə dadlı yeməklər hazırlayın – MƏSLƏHƏT
Ramazan ayında xanımları ən çox düşündürən iftar süfrəsinə bişirəcəkləri yeməklərdir.
Rakus.az xəbər verir ki, iftar süfrəsində fərqli reseptlərlə dadlı yeməklər hazırlamaq mümkündür.
Mərcimək şorbası
Ərzaqlar:
1 stəkan qırmızı mərcimək
1 ədəd soğan
1 yemək qaşığı un
1 ədəd kök
Yarım xörək qaşığı bibər və ya pomidor pastası
Duz, qara istiot zövqə görə
1 litr su
2 yemək qaşığı yağ
Sous üçün:
2 yemək qaşığı kərə yağı
1 çay qaşığı qırmızı istiot
Hazırlanması:
Soğanı xırda doğrayıb yağda qovurun. Üzərinə un əlavə edib az odda qarışdıra-qarışdıra bişirin. Tomat pastası töküb, xırda doğranmış kök və yuyulmuş, suyu sıxılmış mərciməkləri tökün. Üzərinə suyu əlavə edib, qarışdırıb, qazanın qapağını bağlayın. Şorba bişdikdən sonra blenderlə əzin. Əgər çox qatı olarsa, bir az su əlavə edib, azca qaynada bilərsiniz.
Balaca tavaya kərə yağı və qırmızı bibər töküb vam odda azca saxlayın. Şorbanı süfrəyə verərkən, üzərinə yağdan əlavə edin. Əgər istəsəniz şorbaya azca ət suyu tökə bilərsiniz. 1 kasa Mərcimək şorbası 85 kaloridir.
Kartoflu köftə
Ərzaqlar:
Çəkilmiş ət – 500 qr.
Soğan – 1 ədəd
Şirin və acı bibər – 5 ədəd
Pomidor – 4 ədəd
Kartof – 4 ədəd
Yumurta – 1 ədəd
Qaraistiot, duz, kəklikotu zövqə görə
3 xörək qaşığı kərə yağı
2 stəkan isti su
Hazırlanması:
Əti qaba töküb üzərinə sürtğəcdən keçirilən soğan, istiot, duz, kəklikotu, yumurta əlavə edib qarışdırın. Köftələri hazırlayıb kənara qoyun. Bibər, kartof və pomidorları doğrayın. Sobaya qoyacağınız qaba köftələri düzün, üzərinə kartof, bibər və pomidorları da əlavə edib, 2 stəkan suyu tökün. Sonda kərəyağını üstünə əlavə edib sobaya qoyun. Bir az duz və istiot da səpin. 180 dərəcədə 1 saata yaxın bişirin.
