Füzulililər ağacəkmə aksiyasına böyük coşqu ilə qoşuldular - FOTO
Azərbaycan Respublikasının Birinci vitse-prezidenti Mehriban xanım Əliyevanın mütəfəkkir şair İmadəddin Nəsiminin 650 illik yubileyi münasibətilə respublikamızda bir gündə 650 min ağacın əkilməsi təşəbbüsünə Füzulililər böyük coşqu ilə qoşulublar.
Rakus.az xəbər verir ki, aksiyada, Füzuli rayon İcra Hakimiyyətin başçısı Alı Alıyev, İcra nümayəndələri və yüzlərlə rayon sakini könüllü olaraq iştirak edib.
Füzuli Rayon İcra Hakimiyyəti başçısı Alı Alıyev qeyd edib ki, “Azərbaycanın Birinci vitse-prezidenti Mehriban xanım Əliyevanın bir gündə 650 min ağac əkilməsi təşəbbüsü çərçivəsində, bu gün dekabr ayın 6-sı səhər saatlarından Füzuli rayonu ərazisində müxtəlif növ meyvə tinglərinin əkilməsinə başlanılıb. Bayram əhval-ruhiyyəsində təşkil olunan bu genişmiqyaslı aksiya çərçivəsində qabaqcadan ağacların əkiləcəyi ərazilər müəyyənləşdirilib, həmin ərazilərdə şum aparılıb, çalalar qazılıb və sahələr gübrə verilərək əkinə hazırlanıb. Gün ərzində rayon ərazisində 5000 ağac tinginin əkilməsi nəzərdə tutulub. Bu təşəbbüs ölkəmizdə ekoloji mühitin sağlamlaşdırılmasına böyük bir töhfədir. Bu gözəl təşəbbüsü irəli sürdüyünə görə Birinci vitse-prezident Mehriban xanım Əliyevaya minnətdarlığımı bildirirəm.”
Daha sonra aksiya Füzuli Dövlət Dram Teatrın aktyorların çıxışları və musiqi sədaları ilə davam edib.
Ümumiyyətlə, bu gün Azərbaycanda ağacəkmə kampaniyasına start verilib. Ağacların əkiləcəyi ərazilərin xəritəsi hazırlanıb. Xəritə Naxçıvan Muxtar Respublikası da daxil olmaqla Azərbaycanın bütün regionlarını əhatə edir. Ağacların böyük hissəsi magistral yolların kənarında əkilir. Ən çox bar verən nektar ağaclarının əkilməsinə üstünlük verilir. Ölkədə, ümumilikdə, 650 min ağac əkiləcək.
Xatırladaq ki, ağacəkmə aksiyasında məqsəd dahi şair İmadəddin Nəsiminin dünya əhəmiyyətli poeziyasının beynəlxalq aləmdə təbliği, xatirəsinin əbədiləşdirilməsi, Azərbaycanın ədəbi və mədəni irsinin tanıdılmasıdır.
