Gələcək zaman və zaman Gələcəkmi? – SƏRBƏST DÜŞÜNCƏ - FOTO
ZAMAN – əksəriyyətimizin məqamında dəyər verə bilmədiyimiz, geriyə dönməsi mümkün olmayan vaxt itkisidir. Zamandan zamanında faydalanmağın və yaxud fövtə verməyin avantaj və dezavantajıyla bağlı folklorumuzda kifayət qədər ibrətamiz kəlamlara rast gələ bilərik.
Məsələn, dəmiri isti-isti döymək, bu günün işini sabaha saxlamamaq və s. Amma nə fayda ki, bizlər dünyada zamana zamanında hökm edə bilmirik, bu günün işini nəinki sabaha, qeyri-müəyyən gələcək zamana buraxırıq. Şəxsi və hətta milli taleyüklü məsələlərdə belə zamanı gəldiyində dönuş yaradacağımıza özümüzü inandırmağa çalışmaqla nəinki günlərimizi, aylarımızı, habelə illərimizi boşa veririk.
Çox qəribədir, bəzən gələcəyə nikbin düşüncələrlə baxıb zamanı gələndə zamanında itirdiklərimizi geri qaytaracağımıza ümidlənirik, bəzən isə tam əksinə, bədbinliyə varıb bu gün əlimizə düşən imkanlardan nəyi var istifadə edib dar günün dayağı təfəkkürüylə özümüzə və dövlətimizə qənim kəsilirik.
Məncə, dünyada bizim kimi gələcəyi üçün isıqlı və ya qaranlıq sonluqlarda (bəlkə də sonsuzluqlarda)var-gəl edən kimsə ola bilməz. Şəxsən öz adıma deyə bilərəm ki, illər öncə elmi yaradıcılıqla bağlı boşuna buraxdığım zamanın yerini dolduracaq zaman gəlmədi… Bu, bir aksiomadır ki, bütün nailiyyətlərin əsası mümkün bütün imkanlardan, fürsətlərdən vaxtında yararlanmaqdır. Semestr imtahanına hazırlaşan istənilən tələbə tədris boyu oxumaqla müqayisədə saxlayıb imtahan öncəsi oxumağın nə qədər çətin olmasının əziyyətini yaşamamış deyil. Həyat da belədir, zamanında gələcək zamana saxladığımız hər işimiz, həlli vacib problemlərimiz sonda özümüzdən başqa heç kimə əziyyətlər bahasına başa gəlməyəcək.
Zaman – təkcə saatın əqrəblərinin üstünə basdığı rəqəmlər, gecəylə gündüzün yerdəyişməsi, təmtəraqla qeyd etdiyimiz doğum günümüz, kağız üzərindəki təqvim deyil, Zaman – məqamdır, andır, ixtiradir, ailiyyətdir, qalibiyyətdir, vasitədir, təkamüldür, tərəqqidir, özünü təsdiqdir. Bir sözlə, Zaman – zamanında dəyərlənənlər üçün işıqlı gələcəkdir, gələcək zamana ümidlənənlərin isə, mənim elmi həyatımdakı kimi,
zamanı heç zaman gəlməyəcəkdir. Ey zamanının gələcəyinə özlərini inandıranlar, bilin, o zaman gəlməyəcək, O zaman bu gündür, sabah başqasının zamanıdır!!!
Murad Məmmədov – jurnalist
