“Gözüm səni axtarır, ata” – “Şəhid imza” yeni layihə - FOTO - VİDEO
“Jurnalist Sənətkarlığının İnkişafına Dəstək” İctimai Birliyi (QHT) bir ilkə imza atıb.
Rakus.az xəbər verir ki, Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Şəhid imza” layihəsi çərçivəsində videoçarx hazırlanıb.
QHT sədri Günel Gözəlova Baku TV-yə müsahibəsində bildirib ki, sözügedən videoçarx monoloq janrında çəkilib: “Çarxın qəhrəmanı şəhid jurnalist həmkarımız Məhərrəm İbrahimovun 8 yaşlı oğlu Toğrul İbrahimdir.
Toğrul: “Salam ata, mən gəlmişəm. Sənin üçün çox darıxıram. Hər yerdə gözüm səni axtarır!”
Günel Gözəlova: Toğrul bu videoçaxda öz hislərini, həyacanlarını o qədər gözəl bölüşüb ki, insan özünü sanki onun yerinə qoyur və körpə yaşlarından atasının terror qurbanı olduğunu bilən bir gələcəyin əsgərinin nə qədər iztirabla böyüdüyünü bu videoçaxda Toğrul bütün tamaşaçılara çatdırır.
Toğrul: “Narahat olma, ata, heç birinə əl dəymirəm. Hərdən otaqdakı ətirindən az-az vururam. Qorxuram ki, birdən qutarar”.
Günel Gözəlova: “Jurnalist Sənətkarlığının İnkişafına Dəstək” İctimai Birliyinin bu layihəni icra etməkdə əsas məqsədi ondan ibarətdir ki, bu günə qədər 1-ci və 2-ci Qarabağ savaşında şəhid olan jurnalistlərimizin, həmkarlarımızın heç də hamısının adının bir arada çəkildiyi bir videoçarx, bir nəşr yox idi. Bunu çox təəssüflə qeyd edirəm, amma artıq bu gündən sonra bu, olacaq. Biz araşdırma elədik və məlum oldu ki, 1-ci və 2-ci Qarabağ savaşında öz peşəsini icra etmək üçün savaşa qatılan, eyni zamanda, öz peşəsini yarımçıq qoyub gedib səngərdə Vətəni uğrunda mübarizə aparan bizim jurnalist həmkarlarımız 16 nəfərdir. Bu, 16 nəfərin adının çəkildiyi ilk videoçarx olacaq, “Şəhid imza” videoçarxı. Mən ümid edirəm ki, bu videoçarxtan sonra artıq bizim jurnalistlərimiz Qarabağa yollanarkən daha ehtiyatlı olacaqlar. Çünki siz də xatırlayırsınız ki, sonuncu qurbanlarımız bizim mina qurbanı oldu və nəzərə alsaq ki, hələ də mina terroru davam edir. Mən ümid edirəm, bu videoçarxda adı sadalanan adlardan sonra və bu adların çoxluğunu nəzərə alıb bizim jurnalist həmkarlarımız öz peşəsini icra edərkən işğaldan azad olunmuş torpaqlarımızda daha diqqətli olacaqlar.
Videoçarxın sonunda Toğrul atasının həmkarlarına bu mesajını da verir: “Ata, bilirsən, mən də böyəndə sənin kimə əsgər olacam, iş yoldaşlarınla görüşəcəm, ilk səngərləri xəbərdar edəcəm. Çünki onlar da sənin kimi şəhid ola bilərlər. Təhlikə hələ bitmir. Ermənilər bütün hər yerə mina basdırıblar. İstəmirəm, kimsə mənim kimi atasız qalsın”.
Xatırladaq ki, “Şəhid imza” layihəsinin icrasına iyul ayının 1-dən start verilib. Layihə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə həyata keçirilib. Çarxda 1-ci və 2-ci Qarabağ savaşında şəhid olan jurnalistlər və ümumilikdə həlak olan media mənsublarının tam siyahısı öz əksini tapıb. “Jurnalist Sənətkarlığının İnkişafına Dəstək” İctimai Birliyinin müvafiq layihəni icra etməkdə əsas məqsədi heç bir media resursunda, KİV matrealında bütünlükdə siyahının olmamasıdır.
Birliyin sədri, tanınmış telejurnalist, Baku Tv-nin məsul redaktoru Günel Gözəlovanın sözlərinə görə, videoçarxda 1-ci və 2-ci Qarabağ savaşında həlak olan 16 nəfər media mənsubunun adı yer alıb: “30 illik işğal zamanı Ermənistanın Azərbaycana qarşı haqsız müharibəsində canlarını fəda etmək uğrunda qələmini silaha çevirən, peşəsinin icrasını yarımçıq qoyub səngərdə vuruşan media mənsubları bu yolda canından keçiblər. Lakin onların bəzilərinin adı demək olar ki, heç yerdə çəkilmir. Əsas məqsəd bu vidoçarx vasitəsilə ermənilərin media mənsublarına qarşı terrorunu bir daha gündəmə gətirməkdir. Eyni zamanda, beynəlxalq aləmdə peşəsini icra edərkən toxunulmaz sayılan media nümayəndələrinə qarşı törədilən cinayət faktları və hələ də işini icra edəcək olan jurnalistlərin ermənilərin Azərbaycan torpaqlarında yerləşdirdikləri yeraltı ölüm – minalar sayəsində həyatlarının təhlükədə olması faktını vurğulamaqdır. Körpələrin valideynsiz, media subyektlərinin peşəkar əməkdaşsız qalması ermənilərin daha bir məqsədli terrorunun sübutudur.
