Həsən bəy davamçıları, “Əkinçi” yolçuları… – Tələbə yazır
Müstəqil mətbuatın mövcudluğu hər bir dövlətin, millətin öz varlığını qoruyub saxlaması üçün olduqca vacibdir. Çünki mətbuat cəmiyyətin güzgüsü, xalqın tribunasıdır. Elə bir tribunadır ki, ən vacib məsələlər burada müzakirə edilir, qaranlıqlara işıq saçılır, problemlər həll olunur. Fərəhləndiricidir ki, Azərbaycan müstəqil mətbuatı üç əsrlik tarixə malikdir. Hələ 1875-ci ilin iyul ayının 22-də “Əkinçi” qəzeti ilə milli mətbuatımızın əsasını qoyan Həsən bəy Zərdabi xalqın maariflənməsini qarşıya əsas məqsəd kimi qoydu və iki il müddətində (qəzet 1877-ci ilə kimi fəaliyyət göstərib) müəyyən qədər bunu bacardı. Onun ən böyük qələbəsi isə ağır çar senzurası ilə mübarizə apararaq mətbuatımızın ilk qaranquşunu təsis etməsi oldu. Bunun ardınca onlarca yeni qəzet və jurnal çap olundu-“Kaspi”, “Həyat”, “Tazə həyat”, “İqbal”, “Babayi-əmir”, “Azərbaycan”… Ziyalı şəxslərin sayəsində təkcə Şimali Azərbaycanda yox, həm də Cənubi Azərbaycanda mətbu orqanlar meydana çıxdı, mühacir mətbuatı yarandı, inkişaf etdi. Və, nəhayət, mətbuatımız bu günkü müasir inkişaf mərhələsinə çatdı. İndi ölkədə yüzlərlə qəzet və jurnal fəaliyyət göstərir. Təbii ki, hamısı eyni səviyyədə deyil. Lakin əminliklə demək olar ki, hazırda şərəflə, ləyaqətlə xalqa, millətə xidmət edən, doğru, düzgün, dəqiq, operativ, qərəzsiz, obyektiv informasiyanı özləri üçün müqəddəs hesab edən, lazım gələndə qələmini süngüyə, sözünü silaha çevirməkdən çəkinməyən jurnalistlər kifayət qədərdir. Və bu gün onların bayramıdır. Bayramınız mübarək, əziz mətbuat nümayəndələri!
Onlar yenə də redaksiyalarda növbəti nömrənin qayğısı ilə götür-qoy edir, məsləhətləşir, materiallar hazırlayırlar. Yəqin ki, çoxları da bu yazını elə iş yerlərində oxuyacaq. Bir-birlərini görəndə təbəssümlə təbrikləşəcək və Həsən bəy Zərdabinin, Üzeyir bəy Hacıbəylinin, Məmməd Əmin Rəsulzadənin…xatirəsinə dərin ehtiram hiss ilə işlərini görməyə, oxucuları ilə görüşməyə tələsəcəklər.
Kənan Novruzov,
BDU-nun jurnalistika fakültəsinin üçüncü kurs tələbəsi
P.S: Bütün müəllimlərimi, o cümlədən ilk müəllimim olan babam Əməkdar jurnalist Oqtay Bayramovu və tanıdığım və tanımadığım layiqli jurnalistlərin hər birini peşə bayramı münasibətilə təbrik edirəm. Daim qələminiz iti, sözünüz qüdrətli olsun!
