“Hüquqi məsuliyyət” beynəlxalq elmi konfransı keçirilir - FOTO
Aprelin 29-da Azərbaycan Milli Elmlər Akademiyası (AMEA) Hüquq və İnsan Haqları İnstitutunun, Türkiyənin Özyeğin Universitetinin hüquq fakültəsinin və Vəkillər Kollegiyasının birgə təşkilatçılığı ilə “Hüquqi məsuliyyət” mövzusunda beynəlxalq elmi konfrans keçirilir.
Rakus.az xəbər verir ki, Hüquq və İnsan Haqları İnstitutunda keçirilən, hüququn müxtəlif sahələri üzrə tətbiq olunan məsuliyyətə həsr edilən konfrans Prezident İlham Əliyevin görkəmli publisist və tənqidçi, tanınmış hüquqşünas və şərqşünas alim Əhməd bəy Ağaoğlunun anadan olmasının 150 illiyinin keçirilməsi haqqında 2019-cu il 10 aprel tarixli Sərəncamına əsasən təşkil edilib.
Tədbiri açan AMEA Hüquq və İnsan Haqları İnstitutunun direktoru, Milli Məclisin deputatı, hüquq üzrə elmlər doktoru, professor Aytən Mustafazadə hüquq sisteminin müxtəlif sahələri üzrə hüquqi məsuliyyət, eləcə də ölkəmizdə və beynəlxalq aləmdə aktual sahələri olan süni intellekt və tibb hüququ, bu sahə üzrə mövcud problemləri tənzimləyən qanunvericilik aktları, cinayət, mülki məsuliyyət barədə geniş məlumat verib.
Sonra Vəkillər Kollegiyasının İntizam Komissiyasının sədri Şahmar Məmmədov çıxış edərək vəkillərin hüquq sistemində zəruri rolu, hüquqların müdafiəsi istiqamətində görülmüş işlər, hüquqi məsuliyyətin tətbiqi zərurəti barədə danışıb.
Özyeğin Universitetinin hüquq fakültəsinin dekanı, hüquq elmləri doktoru, professor Yener Ünver isə Türkiyədə mövcud hüquqi məsuliyyətdən danışıb.
Konfrans bölmə iclasları ilə davam edir.
