Azərbaycan “Bir kəmər, bir yol” layihəsinin əsas həlledici ölkəsinə çevrilib
Qərbi Azərbaycan Xronikası layihəsi çərçivəsində növbəti analitik süjet hazırlanıb.
Rakus.az xəbər verir ki, “İlham Əliyevin həmləsi Ermənistanda təşviş yaradıb” adlı süjetdə Azərbaycan-Çin münasibətlərinin inkişafı fonunda Zəngəzur dəhlizinin açılması perspektivinin güclənməsinin Ermənistanda narahatlıqla izlənilməsindən bəhs olunur.
Bildirilir ki, Prezident İlham Əliyevin Çinə dövlət səfəri, Azərbaycan liderinin Pekində yüksək səviyyədə qəbul edilməsi və Avrasiyanın yüksələn gücünün Bakıya tam dəstək ifadə etməsi erməniləri qorxuya salıb: “Azərbaycan-Çin münasibətlərində Avrasiyanın gələcəyini müəyyən edəcək nəqliyyat şəbəkələrinin rolu xüsusilə əhəmiyyətlidir. 2013-cü ildə Pekin tərəfindən irəli sürülən nəhəng “Bir kəmər, bir yol” layihəsinin Çini supergücə çevirə biləcək potensiala malik meqaplan olmaqla yanaşı, Avrasiyanın gələcək 50 illik siyasi-iqtisadi münasibətlər sistemini də formalaşdıracağı proqnozlaşdırılır. Azərbaycan “Bir kəmər, bir yol” layihəsinin əsas həlledici ölkəsinə çevrilib və Pekinin Bakıya verdiyi önəmin təməlində bu amillər də dayanır. Orta dəhlizin perspektiv imkanlarını gücləndirmək üçün Zəngəzur dəhlizi layihəsi də reallaşmalıdır”.
Qeyd olunur ki, Zəngəzur dəhlizi Orta dəhlizin Cənubi Qafqaz habında alternativ keçid rolunu oynayır: “Avrasiyanın yüksələn gücü olan Çin Zəngəzur dəhlizinin açılmasında Azərbaycanı dəstəkləyir və bu, Bakının dəhliz məsələsində irəliyə doğru növbəti addımı kimi dəyərləndirilə bilər. Ermənistanda narahatlıq yaradan əsas məqam da məhz budur”.
Erməni ekspertlər Qarnik Davtyan, Vahe Davtyan bildiriblər ki, Azərbaycan Çinlə güclü əlaqələrə malik olmaq baxımından Ermənistanı qabaqlayıb və bu, Zəngəzur dəhlizinin perspektivlərini gücləndirir: “Azərbaycan son illər Çinlə münasibətləri öz xeyrinə xeyli inkişaf etdirib. Bu, Ermənistanı narahat etməlidir, çünki dəhlizin açılması həm də Çindən asılıdır və Pekin Tehranla əlaqələrindən istifadə edərək, İranın dəhlizlə bağlı möveyinə təsir edə bilər. Rəsmi Bakı “Bir kəmər, bir yol” layihəsi çərçivəsində Zəngəzur dəhlizini lojistik infrastrukturun tərkib hissəsi kimi təqdim edir. İlham Əliyevin Pekinə səfəri zamanı bu məsələdə razılaşma əldə olunduğu görünür və Azərbaycan bununla Zəngəzur dəhlizinə doğru daha bir addım atdı”.
Sonda vurğulanır ki, Prezident İlham Əliyevin Çin səfərinin dərin strateji hədəflərinin olduğu aydın görünür: “O da aydındır ki, Avrasiyada əsas gücə çevrilən Çinin Azərbaycana tam dəstək verməsi Zəngəzur dəhlizi layihəsinin reallaşmasını sürətləndirəcək”.
Xatırladaq ki, Qərbi Azərbaycan Xronikası layihəsinin məqsədi tarixi qədim torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.
Həmçinin Prezident İlham Əliyevin Qərbi Azərbaycanla bağlı dediyi “XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin”, – fikrini əsas tutaraq Qərbi Azərbaycan İcmasının hazırladığı Qayıdış Konsepsiyasında irəli gələn vəzifələrin təbliğidir.
Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.
Süjet sənətşünaslıq üzrə fəlsəfə doktoru Elçin Əlibəylinin təqdimatında mayın1-də saat 19:30-da Baku Tv-nin efirində və saat 21:30-da YouTube kanalında yayımlanıb.
