“İranla dövlət sərhədində yeni buraxılış məntəqələri açılacaq” – DSX rəisi
“Bu ildə qarşıda bir sıra məqsədlərimiz var. Avtomobil yolunun, yeni dəmiryolunun açılışı, yeni körpünün inşa olunması – bunlar xidməti əlaqələrin inkişafının təzahürüdür”.
Rakus.az xəbər verir ki, bu barədə Dövlət Sərhəd Xidmətinin (DSX) rəisi, general-polkovnik Elçin Quliyev Astarada jurnalistlərə verdiyi müsahibəsində məlumat verib.
DSX-nin rəisi daha sonra deyib: “2018-ci illə müqayisədə ötən ildə dövlət sərhəd buraxılış məntəqəsində həm vətəndaşların, həm də nəqliyyat vasitələrinin keçidində artım olub. Dövlət sərhədindən keçən şəxslərin sayı 21,5 faiz, nəqliyyat vasitələrinin sayı isə 13 faiz artıb”.
E.Quliyev qeyd edib ki, İran İslan Respublikasının Sərhəd Qoşunlarının komandanı ilə dövlət sərhədində yeni buraxılış məntəqələrinin fəaliyyəti başlaması məsələləri müzakirə olunur. Bu məsələ, həm də, hökumətlər arasında müzakirə obyektidir. Sərhədyanı digər əlaqələrin qurulması, inkişaf etdirilməsi bu gün gündəlikdədir.
“Bütün bunlar ölkələrimiz arasında olan xoş münasibətin təzahürü, göstəricisidir. Prezident İlham Əliyev daim Azərbaycan-İran əlaqələrinin sərhəd mühafizəsi istiqamətində inkişafına dair göstərişlər verir. Biz də çalışırıq ki, dövlətimizin başçısının bu tapşırıqlarını ən yüksək səviyyədə icrasını təmin edək”, – E.Quliyev vurğulayıb.
