“İrəvan- tariximizin məbədidir” – Qərbi Azərbaycan Xronikası - FOTO - VİDEO
Bu gün Qərbi Azərbaycan Xronikası layihəsi çərçivəsində rus dilində ilk buraxılışı efirə gedib.
Rakus.az xəbər verir ki, xəbər verir ki, aparıcı Ellada Sarvanın müsahibi Əməkdar jurnalist, Bakı Slavyan Universitetinin professoru Şəlalə Həsənova olub.
O, indiki Ermənistan ərazisi ilə bağlı çoxsayda araşdırmalar apardığını, Qərbi Azərbaycanın strateji məkan kimi mühüm anlam daşıdığını, indiki Ermənistanda mövcud olan Azərbaycan toponimləri ilə bağlı interaktiv xəritə portalı yaratdığını bildirib.
Onun sözlərinə görə, ermənilər həmişə tarixi saxtalaşdırıblar və özlərini dırnaq içində ən qədim xalq kimi qələmə veriblər: “Bunların hamısı uydurmadır. Son dövrlərdə Qərbi Azərbaycan, İrəvan haqqında yeni tarixi həqiqətlər üzə çıxır. Bu tarixi torpaqlarımızdı, biz İrəvana qayıtmalıyıq. İrəvan tariximizin məbədidir. Ermənistanın ilk xristiyan ölkəsi olmadığına dair inanılmaz dəlil tapılıb. Arxeologiya sübut edir ki, qədim vaxtlardan ermənilər müasir Ermənistanın ərazisində yaşamayıblar”.
Nadir Şahın sevdiyi almazın erməni tacir tərəfindən II-ci Yekaterinaya satıldığını və bu vəsaitə erməni kilsəsi tikildiyini söyləyən Ş.Həsənova araşdırmalarında ermənilərin etnik təmizləmə, oğuz-türk izlərinin itirilməsi siyasəti barədə yeni faktlara rast gəldiyini, bu istiqamətdə yerevanqala500.com və West-land.az saytları yaratdığını və 10 bədii film hazırladığını diqqətə çatdırıb.
Professor Ermənistan hakimiyyətinin indi ölkədəki demoqrafik vəziyyətdən ciddi şəkildə narahat olduğunu, məhz buna görə onlar Qərbi azərbaycanlıların doğma yurda qayıdışının təmin olunmasını istəmədiklərini deyib, Qərbi azərbaycanlıların Vətənə qayıdışının reallığa çevrilməsi üçün aparılan bugünkü siyasəti yüksək qiymətləndirib.
Xatırladaq ki, Qərbi Azərbaycan Xronikası layihəsinin məqsədi tarixi qədim torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.
Həmçinin Prezident İlham Əliyevin Qərbi Azərbaycanla bağlı dediyi “XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin”, – fikrini əsas tutaraq Qərbi Azərbaycan İcmasının hazırladığı Qayıdış Konsepsiyasında irəli gələn vəzifələrin təbliğidir.
Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.
Veriliş sentyabrın 21-də saat 19:30-da Baku Tv-nin efirində və Youtube kanalında yayımlanıb.
