Jurnalistin “Həyat hekayəsi” bu gün Baku Tv-nin efirində – ANONS
Bu gün Baku Tv-nin efirində Qərbi Azərbaycan Xronikası layihəsi çərçivəsində “Həyat hekayəsi” verilişi efirə gedəcək.
Rakus.az xəbər verir ki, bugünkü veriliş Qərbi Azərbaycandan qaçqın, jurnalist Əsgər İbrahimovun həyat hekayəsinə həsr olunub.
O, 1972-ci il sentyabrın 20-də Göyçə mahalının Ardanış kəndində dünyaya göz açıb. 1988-ci il noyabrın 5-də məcburiyyət qarşısında doğulub boya-başa çatdığı kəndi tərk edib, deportasiyaya məruz qalıb.
Bu gün jurnalist kimi fəaliyyət gösrtərən Ə.İbrahimov qədim oğuz-türk yurdu olan Qərbi Azərbaycandan söz açıb, strateji, zəngin təbiəti olan Göyçə ilə bağlı xatirələrini bölüşüb, uşaqlıq illərindən, kəndi tərk etməsindən, ermənilərin törətdiyi faciələrdən, ailəsi deportasiyaya məruz qalaraq pərən-pərən düşməsindən danışıb, erməni terroruna məruz qalan şəcərəsindən söhbət açıb.
O, Göyçənin simvolu, Qərbi Azərbaycanın əksər mahallarının genetik kodu olan sazın müqəddəsliyindən söz açaraq, ustad Aşıq Alıdan, Dədə Ələsgərdən şer oxuyub, bu mahalda keçirilən Novruz bayramının oğuz-türk toplumunun milli ənənəsi olduğunu, ermənilərin bundan həmişə narahatlıq keçirdiyini bildirib.
Əsgər İbrahimovun “Həyat hekayəsi”nə fevralın 8-də saat 22:00-da Baku Tv-nin efirində baxa bilərsiniz.
