“Mançester Yunayted” və “Arsenal” bu gün görüşür
Bu gün UEFA Avropa Liqasının yarımfinal mərhələsinə start veriləcək.
Rakus.az xəbər verir ki, “Old Traford”da “Mançester Yunayted” İtaliyanın avrokuboklarda yeganə təmsilçisi “Roma”nı qəbul edəcək.
Hər iki komandada oyun öncəsi itkilər var. Mançester klubunda Fil Cons və Antoni Marsiyal diz zədəsi səbəbindən oynaya bilməyəcək. Roma klubunda isə Rikkardo Kalafyori, Pedro, Nikolo Zanyolo zədəli, Canluka Mançini cəzalıdır.
İndiyədək rəsmi görüşlərdən ancaq bir-birləri ilə Çempionlar Liqasında üz-üzə gəlmiş tərəflərin sonuncu qarşıdurması 2014-cü ilə təsadüf edib. Tərəflər arasında diqqət çəkən görüş isə 2007-ci ilə təsadüf edib. “Mançester Yunayted” Çempionlar Liqasında bu rəqibini topa tutub – 7:1.
İspaniyanın “Estadio de la Seramika” stadionunda keçiriləcək “Vilyareal” – “Arsenal” matçı isə Unay Emeri amilinə görə maraqlıdır. Sonuncu dəfə “Arsenal”ı 2019-cu ildə – bu turnirin Bakıdakı finalına çıxarmış bask məşqçi indi “Vilyareal”la bu nailiyyətə imza atmaq niyyətindədir.
“Vilyareal”da İbora zədəlidir. “Arsenal”da isə braziliyalı mərkəz müdafiəçisi David Luizin oynayıb-oynamayacağı sual altındadır. Bu komandalar dörd dəfə Çempionlar Liqasında qarşılaşıb. “Arsenal” bu matçlardan ikisində qalib gəlib, iki dəfə isə heç-heçə qeydə alınıb.
Avropa Liqası
1/2 final (ilk görüşlər)
29 aprel
23:00 “Mançester Yunayted” (İngiltərə) – “Roma” (İtaliya)
23:00 “Vilyareal” (İspaniya) – “Arsenal” (İngiltərə)
