Müdafiə Sənayesi Nazirliyi işçiləri peşə bayramını qeyd etdilər - FOTO
Azərbaycan Respublikasının Prezidenti İlham Əliyevin 2009-cu il 10 noyabr tarixli Sərəncamı ilə əsası qoyulmuş 17 dekabr – Azərbaycan Respublikası Müdafiə Sənayesi Nazirliyi işçilərinin peşə bayramı təntənəli şəkildə qeyd olunub.
Rakus.az xəbər verir ki, Müdafiə Sənayesi Nazirliyindən verilən məlumata görə, bu əlamətdar gün münasibətilə nazirliyin əməkdaşları Fəxri xiyabana gedərək ümummilli lider Heydər Əliyevin xatirəsini ehtiramla yad edib, abidəsi önünə əklil qoyublar. Eyni zamanda, görkəmli oftalmoloq-alim, akademik Zərifə xanım Əliyevanın, görkəmli dövlət və elm xadimi Əziz Əliyevin və tibb elmləri doktoru, professor Tamerlan Əliyevin məzarlarını ziyarət edərək önünə gül dəstələri düzüblər.
Nazirliyin kollektivi daha sonra Şəhidlər xiyabanına gedərək Azərbaycanın müstəqilliyi və ərazi bütövlüyü uğrunda canlarından keçmiş şəhidlərimizin məzarlarını yad edib, “Əbədi məşəl” abidəsinin önünə əklil qoyublar.
Tədbirin rəsmi hissəsi nazirliyin akt zalında dövlət himninin səsləndirilməsi ilə başlayıb.
Nazir Mədət Quliyev mərasimdə çıxış edərək bütün şəxsi heyəti peşə bayramı münasibətilə təbrik edib. Ümummilli lider Heydər Əliyevin SSRİ dağılmamışdan əvvəlki dövrlərdə də gələcək müstəqil Azərbaycan dövlətinin yaranmasını düşünərək respublika həyatının bütün sahələrində əvəzsiz işlər gördüyünü xüsusi qeyd edən nazir bugünkü güclü Azərbaycan Respublikasının təməlində Ulu Öndərimizin Vətəninə və xalqına olan sevgisinin dayandığını bildirib. Mədət Quliyev qeyd edib ki, 1991-ci ildə müstəqilliyini bərpa etmiş Azərbaycan Respublikasında xaos və anarxiyanın hökm sürdüyü ağır dövrdə böyük xilaskar Heydər Əliyev xalqını tək qoymayaraq Bakıya gəlib və göstərdiyi misilsiz xidmətlər sayəsində ölkənin möhkəmlənməsi və dünyada tanınması üçün var qüvvəsi ilə çalışıb. Nazir Ulu Öndərin layiqli davamçısı, müasir dövrün yeni lideri olan Prezident İlham Əliyevin rəhbərliyi dövründə dövlətimizin ictimai-siyasi, sosial-iqtisadi və mədəni sahələrdə çoxsaylı uğurlara imza atdığını, Azərbaycanın regionda güc sahibinə çevrildiyini və beynəlxalq nüfuzunun artdığını vurğulayıb.
Bu il Müdafiə Sənayesi Nazirliyinin yaranmasından 14 il keçdiyini qeyd edən Mədət Quliyev Prezident İlham Əliyevin bu sahəyə göstərdiyi xüsusi diqqət və qayğı nəticəsində ötən müddət ərzində nazirliyin müəssisələrində müasir növ silahlar, döyüş sursatları, hərbi texnika, mühəndis-texniki vasitələr və digər müdafiə təyinatlı məmulatların uğurla istehsal edilərək Silahlı Qüvvələrə təhvil verildiyini vurğulayıb.
Daha sonra Müdafiə Sənayesi Nazirliyinin birlik və müəssisələrində çalışan qabaqcıl işçilər döş nişanları, fəxri fərmanlar, qiymətli hədiyyələr və pul ilə mükafatlandırılıb.
Tədbirin sonunda nazirliyin kollektivi adından Azərbaycan Respublikasının Prezidenti İlham Əliyevə müraciət qəbul olunub.
