“Müharibə başlasa, Azərbaycan üçün risklər varmı?” - VİDEO
“Son günlər müharibə mövzusu geniş müzakirə olunur. Peşəkar hərbçi kimi müharibə olacağını düşünmürəm”.
Rakus.az xəbər verir ki, bunu Baku TV-yə açıqlamasında hərbi ekspert Üzeyir Cəfərov bildirib. O deyib ki, Ermənistanın bu gün Azərbaycana qarşı müharibə etmək imkanları yoxdur: “2020-ci ildən bu günə kimi Ermənistan Ordusu 44 günlük savaşda aldığı ağır zərbələrdən sonra hələ də özünə gəlmək imkanı əldə edə bilməyib. Ayrı-ayrı ölkələrdən aldıqları silah-sursat da onları hansısa vəziyyətdən çıxarmaq iqtidarında deyil. Ermənistan hazırda elə bir durumdadır ki, onların edə biləcəyi təxribat çox qısa müddətdə Azərbaycan Silahlı Qüvvələri tərəfindən ən sərt şəkildə cavablandırılacaq”.
Siyasi və Hüquqi Araşdırmalar Mərkəzinin sədri Xəyal Bəşirov isə vurğulayıb ki, görünür Cənubi Qafqzada növbəti eskalasiyada, Ermənistanın Azərbaycana qarşı revanşist müharibəyə hazırlanmasında maraqlı olan qüvvələr israrlıdırlar. : “Onlar əllərindən gələni edirlər ki, Ermənistan Azərbaycana qarşı növbəti müharibə cəhdlərini reallaşdırsın. Əgər Ermənistan Azərbaycana qarşı növbəti eskalasiyaya qərar verəcəksə, tarixdə ilk dəfə müharibə Azərbaycan ərazisində deyil, müharibəni aparmaq istəyən tərəfin ərazisində baş verəcək. Bunun müqəddəratı Ermənistanın hazırkı rəhbərliyinə də, erməni dövlətinə də, xalqına da bəllidir. Amma əgər onlar 270 milyon avro, 65 milyon dollar və yaxud digər rəqəmlər müqabilində öz dövlətlərini, ərazi bütövlüklərini, öz əsgər və zabitlərinin, ordularını təhlükəyə atmaq istəyirlərsə, buyursunlar, Azərbaycana qarşı növbəti müharibəni reallaşdırsınlar və onun nəticələrini görsünlər”.
