“Nakam Aşiq” kitabı çapdan çıxıb
Bu günlərdə Novrəs İmanın yaradıcılığının təhlilindən bəhs edən “Nakam aşiq” adli kitabı işıq üzü görüb.
Rakus.az xəbər verir ki, “İmza” nəşrlər evində nəşr olunan kitabın müəllifi tədqiqatçı-ilahiyyatçı Hacı Həsən Hüseyni, ön sözün müəllifi şair-publisist Qılman İman, redaktoru isə tədqiqatçı-jurnalist Araz Yaquboğludur. Kitabda Novrəs İmanın müxtəlif dini şeirlərinin təhlilindən bəhs edən 10 məqalə, Novrəs İmanın deyişmələri, ona ithaf olunan Zakir Şəhriyazın, Adilə Nəzərin və Şamama Ələsgərlinin şeirləri də yer alıb.
Geniş ictimaiyyətə təqdim olunan 424 səhifəlik kitab Azərbaycan Milli Elmlər Akademiyası Folklor İnstitutu Elmi Şurasının qərarı və “Dədə Ələsgər Ocağı” İctimai Birliyinin dəstəyi ilə çap olunub.
Xatırladaq ki, müəllif Hacı Həsən keçən il böyük ustadımız, Novrəs İmanın əmisi Dədə Ələsgərdən bəhs edən “Əhli-beyt (ə) aşiqi Dədə Ələsgər” kitabını da oxucularına təqdim edib. Həmin kitabda 14 elmi məqalə ustadın 200 illik yubileyinə ithaf olunub.
“Nakam aşiq” kitabı haqqında “Redaktordan” başlıqlı yazıda tədqiqatçı-jurnalist Araz Yaquboğlu belə yazıb: “Müəllif aşıq-şairin dini səpkili şeirlərini geniş təhlil edib. Belə ki, şeirlərdə olan ifadələrə, fikirlərə “Qurani-Kərim”in surələrindəki ayrı-ayrı ayələrdən sitatlar gətirib, hədis və digər müəlliflərin fikirlərindən də istifadə edərək fikirlərini aydın çatdırıb. Müəllif bəzən Novrəs İmanın söylədiyi fikirlər ilə üst-üstə düşən onun müasirlərinin, sələflərinin və xələflərinin də şeirlərindən nümunələr verib. Bu da məqalələri daha da mükəmmələşdirmiş, zəngin edib”.
Kitab elmi və yaradıcı insanlar üçün dəyərli töhfədir.
