Sosial 07.12.2019 15:14

Nəcəf müəllim cəmiyyət üçün örnəkdir - FOTO

Ölçü

A+ A- A

Nəcəf Həsən oğlu Nəcəfov Azərbaycan Yazıçılar Birliyi və Azərbaycan Jurnalistlər Birliyinin üzvü, Əməkdar müəllim, akademik M.Mehdizadə və Qızıl qələm mükafatı laureatıdır. 1935-ci ildə Qərbi Azərbaycanın Amasiya rayonunun Oxçuoğlu kəndində anadan olmuşdur. Atası Qazaxıstana sürgün edilmişdir. 1942-1949-cu illərdə həmin kənddə 7 illik məktəbdə oxumuş, sonra Xanlar Pedaqoji Məktəbinə daxil olmuş, 1953-cü ildə həmin məktəbi bitirərək bir il Amasiya rayonunun Təpəkənd kənd 7 illik məktəbində müəllim işləmişdir. 1954-cü ildə Zərdabi adına Gəncə Pedaqoji İnstitutuna daxil olmuş, 1959-cu ildə oranın tarix-filologiya fakültəsini fəqlənmə diplomu ilə bitirmişdir. 1959-1969-cu illərdə Şamaxı rayonunun Sündü, Nərimankənd orta məktəblərində müəllim, direktor müavini işləmişdir. 1969-cu ilin avqustunda Azərbaycan Mərkəzi Müəllimləri Təkmilləşdirmə İnstitutuna işə dəvət edilmiş, orada metodist, kabinet müdiri vəzifələrində çalışmışdır. 1974-cü ilin iyunundan Azərbaycan SSR Maarif Nazirliyinə Mərkəzi aparatına irəli çəkilmiş, 1976-1988-ci illərdə nazirliyin kadrlar idarəsinin rəisi vəzifəsində çalışmışdır.

Üç nazirlik birləşəndən sonra 1988-1998-ci illərində Təhsil Nazirliyində baş inspektor, Baş idarə rəisi və kadrlar idarəsi rəisinin müavini, Baş inspeksiyanın şöbə müdiri, 1998-2000-ci illərdə Təhsil Problemləri üzrə Respublika Elmi-Metodiki Mərkəzin direktoru (kollegiya üzvü) vəzifələrində çalışmışdır. 1995-ci ildən “Azərbaycan məktəbi” jurnalının redaksiya heyətinin üzvüdür. 2000-ci ilin sentyabrından 2006-cı ilin oktyabrına qədər Azərbaycan Təhsil Nazirliyində dərslik və nəşriyyat şöbəsinin müdiri olmuşdur. 2006-cı ilin oktyabrından “Azərbaycan məktəbi” jurnalının baş redaktorudur. 2005-ci ildən respublikanın Əməkdar müəllimidir. 2012-ci ildən ADPU-nun dosentidir. “Şərəf nişanı” ordeni, “SSRİ maarif əlaçısı”, Azərbaycanın qabaqcıl təhsil işçisi döş nişanları ilə təltif olunmuşdur.

1953-cü ildə ilk dəfə Xanlar rayonunun “Namuslu zəhmət” qəzetində məqalələr və şeirlərlə çıxış etmiş, sonra “Kirovabad kommunisti”, “Azərbaycan gəncləri”, “Ədəbiyyat qəzeti”, “Kommunist”, “Бакинский рабочий” qəzetlərində, “Ulduz”, “Azərbaycan məktəbi”, “Azərbaycan dili və ədəbiyyatı tədrisi”, “Kimya və biologiyanın tədrisi”, “Məktəbdə bədən tərbiyəsi”, “Русский язык в азербайджанский школе” və b. mətbuat orqanlarında, həmçinin “Нородное образование” jurnalında, “Учительская газета”да, Qazaxıstanın “Turan”, Özbəkistanın “Zərəfşan” qəzetlərində məqalələri dərc olunmuşdur. Orta ümumtəhsil məktəbləri üçün “Ədəbiyyat” (IX sinif) dərslik, X və XI sinifləri üçün “Ədəbiyyat müntəxəbatı” (X və XI siniflər üçün) dərs vəsaiti, təlimi rus dilində olan məktəblərin VII sinfi üçün “Azərbaycan dili”, təlim Azərbaycan və rus dilində olan ümumtəhsil məktəblərinin VIII-XI sinifləri üçün “İnsan və cəmiyyət” (“Человек и общество”) dərsliklərinin, ali məktəblər üçün “XX əsr Azərbaycan ədəbiyyatşünaslığı məsələləri” dərs vəsaitinin, ümumtəhsil məktəblərinin V-XI siniflər üçün ədəbiyyat, ali məktəblərin filologiya fakültəsi üçün “XX əsr Azərbaycan ədəbiyyatı” proqramlarının həmmüəlliflərindəndir. 12 dərslik və kitabçanın elmi redaktorudur.

Qəzet və jurnallarda 100-dən çox məqaləsi dərc olunmuşdur.

Türkiyə, İngiltərə, Hollandiya, İtaliya, həmçinin MDB məkanındakı ölkələrdə (Rusiya, Ukrayna, Belarus, Moldova, Özbəkistan, Qırğızıstan, Baltikyanı ölkələr) təcrübə mübadiləsi, yaradıcılıq ezamiyyətlərində olmuşdur.

1971-ci ildə Azərbaycan SSR Maarif Nazirliyinin “Qabaqcıl maarif xadimi”, 1981-ci ildə “SSRİ Maarif Əlaçısı”, 1958-ci ildə Ümumittifaq Komsomolunun “Xam torpaqlardan istifadəyə görə” döş nişanları ilə, 1987-ci ildə “Şərəf nişanı” ordeni ilə, 2009-cu ildə “Qabaqcıl təhsil işçisi” döş nişanı ilə təltif edilmişdir. Qazaxıstan Komsomolunun, Təhsil Nazirliyi və digər təşkilatlarının fəxri fərmanlarını almışdır.

1975-ci ildə Nizami adına Ədəbiyyat və Nəsimi adına Dilçilik İnstitutunun Birləşmiş elmi şurasında “Salman Mümtazın ədəbi və elmi fəaliyyəti” mövzusunda dissertasiya müdafiə edib, filologiya elmləri namizədi adını almışdır.

SSRİ müəllimlərinin mövcud olduğu sürəcə keçirmiş olduğu üç qurultayından üçüncüsünün 1978-ci ildə keçirilən III qurultayının nümayəndəsi olmuşdur.