Sosial 04.01.2020 16:11

Olimpiya ilinə təsadüf edən 75 illik yubiley

Ölçü

A+ A- A

O, mənim həm babam, həm ustadım, həm redaktorum, həm də jurnalistika sahəsində ən böyük uğurlarımın müəllifidir. Hərdən zəng edib deyir: “Təbrik edirəm, yazını oxudum”. Bəzən heç özümün də xəbərim olmur. Hər dəfə təkcə xəbər verməklə kifayətlənmir, həm də yazı ilə bağlı öz fikirlərini- mütəxəssis rəyini deyir. Əlbəttə, haqqı var. Çünki Əməkdar jurnalist, Fəxri bədən tərbiyəsi və idman işçisi, Həsən bəy Zərdabi mükafatı laureatı Oqtay Bayramov ömrünün yarım əsrindən çoxunu idmanımızın təbliğinə və inkişafına həsr edib. O, 1945-ci ildə Qazax şəhərində anadan olub. 1968-ci ildə Azərbaycan Pedaqoji Xarici Dillər İnstitutunun (hazırda Azərbaycan Dillər Universiteti) İspan dili şöbəsini bitirib. 1966-67-ci illərdə Kuba Respublikasında tərcüməçi işləyib. 1968-ci ildən 1995-ci ilədək “İdman” (“Sport”) qəzetində müxtəlif vəzifələrdə çalışıb. 1974-1992-ci illərdə redaktor müavini, 1992-1995-ci illərdə baş redaktorun birinci müavini olub.1995-ci ildən isə peşə fəaliyyətini “Xalq qəzeti”ndə (keçmiş “Kommunist”) davam etdirməyə başlayıb.1980-1986-cı illərdə Yuqoslaviya, Çexoslovakiya, Macarıstan və Meksikada basketbol, həndbol və futbol üzrə Avropa və dünya çempionatlarıni, 1993-cü ildə Hollandiyada gənclərin Avropa Olimpiya Həftəsini yarış meydanından işıqlandırıb . Bu illər ərzində neçə- neçə gənc jurnalistə yol göstərib, öz bilik və bacarıqlarını onlarla bölüşüb.

Əlbəttə, illərdir qələmlə dostluq edən, necə deyərlər, onun hər sirrinə bələd olan jurnalistin təkcə şagirdi yox, həm də nəvəsi olmaq mənim üçün ikiqat fərəhləndiricidir. Ən azından ona görə ki, hər fürsət düşəndə təcrübələrini mənimlə bölüşür, media nümayəndəsinə lazım olan zəruri keyfiyyətlərdən danışır.

Obyektivlik, dəqiqlik, qərəzsizlik, vicdanlılıq onun təkcə peşə prinsipləri deyil, həm də həyat kredosudur. Bütün addımlarında bu keyfiyyətləri rəhbər tutan Oqtay Bayramovun bu günlərdə 75 yaşı tamam oldu. Ailəsi, əzizləri ilə yanaşı, həmkarları, iş yoldaşları da onu təbrik etdilər, ən xoş arzularını çatdırdılar. Maraqlıdır ki, “Facebook” sosial şəbəkəsində həmkarlarından ilk təbrik də ilk addımlarını atdığı “İdman” qəzetinin baş redaktoru, Əməkdar jurnalist Qabil Mehdiyevdən gəldi: Təbrik edirəm Oqtay müəllimi! Uzun ömür arzulayıram. Oqtay müəllim idman mətbuatımızın ağsaqqalıdır.

Sən bir işə bax ki, yarım əsrdən çoxdur, az qala, idmançıların qələbələri ilə nəfəs alan Oqtay Bayramovun 75 illik yubileyi növbəti Olimpiya ilinə təsadüf edir. İnanırıq ki, Oqtay müəllim təkcə bu il Tokioda keçiriləcək Olimpiya Oyunları haqqında yox, eləcə də gələcək dördilliklərdə təşkil ediləcək analoji idman yarışları barədə hazırlayacağı məqalələri, analitik yazıları ilə idman həvəskarlarını yenə sevindirəcək.

İnşallah, 75 yaş 100 olsun. Əsas odur ki, həmişə belə gümrah qalasan, baba! Əsl idmançı xarakterini heç vaxt itirməyəsən. Axı həmişə idmançıların uğurlarını işıqlandırmış, onların qələbələri ilə sevinmisən. Bundan sonra da ən böyük qələbələr sənin olsun, qayğıkeş baba, veteran jurnalist!