Parlamentin iclası başladı, büdcə müzakirə olunur
Milli Məclisin növbədənkənar sessiyasının ilk plenar iclası keçirilir.
Rakus.az xəbər verir ki, spiker Sahibə Qafarova iyulun 12-dən etibarən Ermənistanın Azərbaycanla sərhədin Tovuz rayonu istiqamətində təxribatları zamanı şəhid olan hərbçilərimizin ruhunu bir dəqiqəlik sükutla yad etməyi təklif edib.
Onun təklifi qəbul olunub.
Sonra “2020-ci il dövlət büdcəsi haqqında” qanuna dəyişiklik layihəsi I müzakirəyə çıxarılıb.
Sənədi parlamentin İqtisadi siyasət, sənaye və sahibkarlıq komitəsinin sədri Tahir Mirkişili təqdim edir.
İclasda Maliyyə naziri Samir Şərifov da iştirak edir.
Xatırladaq ki, təklif olunan layihəyə görə, büdcədə gəlirləri üzrə proqnoz 10,5 milyon manat azaldılaraq 24 134,5 milyon manatdan 24 124 milyon manata endirilir, xərclər üzrə proqnoz isə 597,5 milyon manat artırılaraq 26 894,7 milyon manatdan 27 492,2 milyon manata qaldırılır. Son nəticədə büdcə kəsiri üzrə proqnoz 608 milyon manat və yaxud 22% artaraq 2 760,2 milyon manatdan 3 368,2 milyon manata çatacaq.
