Paşinyanın “real Ermənistan” planı praktiki mərhələyə keçir
Qərbi Azərbaycan Xronikası layihəsi çərçivəsində növbəti analitik süjet hazırlanıb.
Rakus.az xəbər verir ki, “Ermənistan Azərbaycanın əsas tələbini daha tez icra edəcək” adlı süjetdə Ermənistan Konstitusiyasının yeni mətninin 2026-cı ilin iyununda keçiriləcək parlament seçkilərinə qədər hazırlanacağından bəhs olunur.
Bildirilir ki, daha öncə Nikol Paşinyan Konstitusiyanın yeni mətninin 2026-cı ilin dekabr ayına qədər hazırlanması, 2027-ci ildə baxılması tapşırığını vermişdi. İndi vaxt önə çəkilir və daha tez hazırlanması gündəmdədir. Baş nazirin bəyan etdiyi kimi, Konstitusiyaya əsaslanan “erməni iddialarını” sıradan çıxarmaq və “real Ermənistan qurmaq istəyir.
Qeyd olunur ki, Ermənistan Konstitusiyanın dəyişdirilməsi tələbi Azərbaycanın gündəliyinə daxildir: “Ermənistan Konstitusiyasında Azərbaycanla yanaşı, Türkiyəyə qarşı da ərazi iddiaları yer alır. Rəsmi Bakı bəyan edib ki, bütün iddialar Konstitusiyadan çıxarılmadan sülhdən danışmaq mümkün deyil. Təbii ki, Ermənistan Konstitusiyası dəyişdirilərsə, bu, Azərbaycanla sülhün əldə edilməsində konstruktiv yanaşma olacaq və sazişin imzalanmasını təşviq edə bilər”.
Bu məsələ Ermənistan mətbuatında və ictimaiyyətində ciddi müzakirələr yaradıb. “Hraparak” nəşri yazır ki, Paşinyanın “real Ermənistan” planı praktiki mərhələyə keçib: “Paşinyan sənədin preambulasında müstəqillik bəyannaməsinə istinadın dəyişdirilməsi üçün Konstitusiyanın dəyişdirilməsi məqsədilə referendumun keçirilməsini təklif edib və bu, hakim partiyanın qapalı görüşündə müzakirə edilib”.
“Fakt” qəzeti isə Ermənistan hakimiyyətinin Konstitusiyanın dəyişdirilməsini hələ 2019-cu ildə gündəmə gətirdiyini yazıb: “2020-ci ildə müharibə bu məsələni arxa plana keçirdi. İndi yeni Konstitusiyanın qəbulundan danışırlar. Bu isə Azərbaycan Prezidenti İlham Əliyevin tələbidir”.
Politoloq Sergey Markedonov, ekspert Qriqori Ayvazyan, “Ana Ermənistan” hərəkatının lideri Andranik Tevanyan hesab edirlər ki, N.Paşinyan erməni milli layihəsini yenidən başlanmasını planlaşdırır: “Onun fəal şəkildə təbliğ etdiyi “real Ermənistan”da diasporun ciddi rolu olmayacaq, qonşulara qarşı ərazi iddiaları, həmçinin, “geosiyasi maksimalizm” istisna olunacaq. Zəngəzur dəhlizinin açılması və azərbaycanlıların Ermənistana qayıtması Azərbaycanın əsas planıdır. Rəsmi Bakı bu hədəflərinə mütləq nail olacaq. Paşinyanın mövcud Konstitusiyadan imtina etmək və yenisini qəbul etmək təşəbbüsü Qərbi Azərbaycan proqramı çərçivəsində baş tutur”.
Sonda vurğulanır ki, Ermənistanda revanşistlər azərbaycanlıların qayıdışını qəbul etmir və bunu gündəmdən çıxarmaq üçün əllərindən gələni edirlər: “Lakin bütün bu cəhdlərin nəticə verməyəcəyi öncədən bəllidir, çünki azərbaycanlıların tarixi torpaqlarına – Qərbi Azərbaycana qayıdışı qaçılmazdır. Ermənistan bu reallığı nə qədər tez qəbul edərsə, onlar üçün bir o qədər yaxşı olacaq, əks təqdirdə, Qarabağda başlanan erməni planlarının məhv edilməsi prosesi Zəngəzurda, İrəvanda davam etdirilə bilər”.
Xatırladaq ki, Qərbi Azərbaycan Xronikası layihəsinin məqsədi tarixi qədim torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.
Həmçinin Prezident İlham Əliyevin Qərbi Azərbaycanla bağlı dediyi “XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin”, – fikrini əsas tutaraq Qərbi Azərbaycan İcmasının hazırladığı Qayıdış Konsepsiyasında irəli gələn vəzifələrin təbliğidir.
Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.
Süjet sənətşünaslıq üzrə fəlsəfə doktoru Elçin Əlibəylinin təqdimatında martın 6-da saat 19:30-da Baku Tv-nin efirində və saat 21:30-da YouTube kanalında yayımlanıb.
