“Ermənistan bölünür, 9 min kvadrat kilometr ərazidə İrəvan Respublikası qurulur”
Qərbi Azərbaycan Xronikası layihəsi çərçivəsində sənətşünaslıq üzrə fəlsəfə doktoru Elçin Əlibəylinin təqdimatında “”2025-ci ildə Nikolizm qalsa, Ermənistandan heç nə qalmayacaq” adlı veriliş efirə gedib.
Rakus.az xəbər verir ki, verilişdə Baş nazir Nikol Paşinyanın yeni Ermənistanı siyasi ambisiya qurbanına və regionda “sözəbaxan dövlətə” çevirmək istəyindən bəhs olunur.
Politoloqlar Arman Abovyan, Harutyun Mkrtçyan, Artur Xaçikyan, sosioloq Karen Sarkisyan, eks vitse-spiker Eduard Şarmazanov, hərbi ekspert Hayk Nahapetyan, sabiq səfir Edqar Kazaryan, “Hayastan” fraksiyasından olan deputat Artur Xaçatryan və “Mülkü müqavilə” Partiyasından deputat Anuş Kloyanın sözlərinə görə, Paşinyan seçkiqabağı regionçuluq oyununu işə salıb: “Paşinyan Ermənistanı sözəbaxan dövlətə çevirmək istəyir. Bu gün Qarabağda sülh, dirçəliş var, amma biz yoxuq. Paşinyan hamımızı kölə etməyə çalışır. Ermənistanın gələcəyi Tehran və Moskvadan asılıdır. 2025-ci ildə Nikolizm qalsa, Ermənistandan heç nə qalmayacaq. Azərbaycanlılar Ermənistana qayıtmalı və biz 60 milyard dollar təzminat ödəməliyik. Paşinyan qaçacaq, insanlar onun ailə üzvlərini tapıb qisas alacaqlar. Bu gün Paşinyan üçün bütün yollar ancaq Moskvaya aparır. Artıq Zəngizurun bəzi əraziləri Azərbaycana verib, amma bunu gizlədirlər. Fransa daha bizi dəstəkləmir, soyqırımı unutmağımızı istəyir. Rəsmi London Bakı ilə hərbi-strateji əlaqələr yaradır. Qərbin müttəfiqləri Azərbaycan, Türkiyə və İsraildir. Hakimiyyət Ermənistanı türk vilayətinə çevirmək istəyir. Ermənistan Koçaryanı və Sarkisyanı Azərbaycan tərəfinə təhvil verəcək. Azərbaycanın bütün tələbləri nəzərə alınıb. Ermənistanın nə güclü ordusu, diplomatiyası, nə də iqtisadiyyatı var. Ermənistan ancaq Azərbaycanla sülhdən sonra firavan ola bilər. Ermənistanda Qarabağdan kanalizasiya borularını oğurlayan generallar olub”.
Verilişdə həmçinin erməni sakinlərinin bəzi fikirlərinə də yer verilir: “Biz heç vaxt müharibə istəmirdik. Müharibəni biz yox, Serj və Koçik istəyirdi. Biz erməni liderlərinə tüpürmək istəyirik. Dünyada 10 milyonluq erməni arasında bu 4 “türkdən” başqa kişi yoxdur?! Bizi əvvəl kor, quldur, oğru idarə etdi, indi də narkomanlar idarə edir. Ermənistan bölünür, 9 min kvadrat kilometr ərazidə İrəvan Respublikası qurulur”.
Xatırladaq ki, Qərbi Azərbaycan Xronikası layihəsinin məqsədi tarixi torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.
Həmçinin Prezident İlham Əliyevin Qərbi Azərbaycanla bağlı dediyi “XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin”, – fikrini əsas tutaraq, Qərbi Azərbaycan İcmasının hazırladığı Qayıdış Konsepsiyasından irəli gələn vəzifələrin təbliğidir.
Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.
Veriliş aprelin 9-da saat 19:30-da Baku Tv-nin efirində və saat 21:30-da YouTube kanalında yayımlanıb.
