Prezidentin bu humanist addımından sui istifadə edilir
Allah eşqinə, Yardımlıda məzlumların haqqının özlərinə qaytarılmasında yardımçı olun…
Prezident İlham Əliyevin 30 oktyabr 2018-ci il tarixli sərəncamı ilə 2019-2030-cu illər üçün ölkəmizdə işsiz və işaxtaran vətəndaşların müvəqqəti məşğulluğu üçün haqqı ödənilən ictimai işlər mexanizmi müəyyən edilib. Mexanizmin şəffaf şəkildə qurulub fəaliyyət göstərməsindən ötrü “İşsizin DOSTu” proqramı hazırlanıb və bu proqramın icrası ilə əlaqədar “DOST İŞ MƏRKƏZİ” Məhdud Məsuliyyətli Cəmiyyət yaradılıb. İşsizlik probleminin qismən də olsa aradan qaldırılması naminə bu, çox gözəl mexanizmdir. Di gəl ki, bu mexanizmdən şəxsi məqsədlər üçün istifadə edənlər də tapılır. Nümunə olaraq Yardımlı rayonunu göstərmək olar…
Məsələn, 2020-ci ilin yanvar ayı üzrə Yardımlıda 230 adam “DOST İŞ MƏRKƏZİ” Məhdud Məsuliyyətli Cəmiyyətdən məvacib alıb. Fəqət, Əmək və Əhalinin Sosial Müdafiəsi Nazirliyinin saytında öz əksini tapan siyahıda adı keçən adamların bir hissəsi həqiqətən də təyin olunduğu iş yerlərində çalışsalar da, bir çoxu rayon sakini olmasına baxmayaraq, kənar bölgələrdə məskunlaşıb. Daha bir hissəsi isə adları müxtəlif müəsissələrdə qeydiyyatda olsa da işə gəlmirlər. Mən hələ siyahidəki yüksək təqaüd alan insanlardan, ikinci iş yeri kimi bu proqramdan istifadə edən adamlardan söhbət açmıram. Bütün bu neqativ halları yoxlamaq elə də çətin deyil, siyahı var, sadəcə ədalət naminə onun doğruluğunu yoxlamaq lazımdır…
Heç şübhəsiz ki, cənab Prezident bu mexanizmin tətbiqini heç yerdən gəliri olmayan, kasıb, imkansız təbəqənin bəhrələnməsi üçün nəzərdə tutub. Axı bu gün Yardımlıda evinə bir qəpik də olsun maddi vəsait daxil olmayan ailələr var. Onlar el-oba adamlarının verdiyi yardımla yaşayırlar. Belə adamları həmin işlərə cəlb etsələr yaxşı olmazmı?..
Bəli, yerlərdə möhtərəm Prezidentin bu humanist addımından sui istifadə edənlər var. Bu işə bilavasitə nəzarət edən insanlara ürək yanğısıyla müraciət edirəm:- Cənablar, aşağıda təqdim etdiyim bu siyahının nə dərəcədə dürüst olduğunu yoxlayandan sonra, dediklərimə əmin olacaqsınız…
Allah eşqinə, məzlumların haqqının özlərinə qaytarılmasında yardımçı olun…
“DOST İş Mərkəzi” MMC ilə əmək müqaviləsi bağlanılmış Yardımlı rayonu üzrə yanvar ayında əməkhaqqı alan ictimai işçilərin siyahısı ilə burada tanış ola bilərsiniz.
Elman Eldaroğlu
