Qabiliyyət imtahanında qeydiyyat bu gün yekunlaşır
V ixtisas qrupunun bədən tərbiyəsi istiqamətinin 60, 61, 62-ci və təsviri sənət istiqamətinin 14-cü komissiyası (dizayn ixtisası) üzrə qabiliyyət imtahanında iştirak etmək üçün qeydiyyat bu gün başa çatır.
Bədən tərbiyəsi istiqamətinin 60, 61, 62-ci (bədən tərbiyəsi və idman, məşqçi, fiziki tərbiyə və gənclərin çağırışaqədərki hazırlığı ixtisasları) və təsviri sənət istiqamətinin 14-cü (dizayn ixtisası) komissiyaları üzrə qeydiyyatdan keçmək istəyən abituriyentlər günün sonunadək Dövlət İmtahan Mərkəzinin (DİM) internet saytının eservices.dim.gov.az/erizebak/qabiliyyet səhifəsinə daxil olaraq göstərilən komissiyalar üzrə qeydiyyatdan keçə bilərlər.
Rakus.az xəbər verir ki, mərkəzdən bildirilib ki, V ixtisas qrupuna daxil olan digər komissiyalar üzrə qeydiyyat isə iyulun 3-dək aparılacaq. Bədən tərbiyəsi və idman istiqamətinə aid xüsusi qabiliyyət tələb edən ixtisasların müsabiqəsində iştirak etmək istəyən abituriyentlər ümumi fiziki hazırlıq imtahanı üzrə normativlərlə DİM-in saytında tanış ola bilərlər. 60 və ya 61-ci komissiyaların hər hansı biri üzrə qabiliyyət imtahanından məqbul qiymət alan abituriyentin nəticəsi biri digərinə və 62-ci komissiyaya şamil edilir. Göstərilən keçidlər yalnız abituriyentlərin müvafiq komissiyalar üzrə qeydiyyatdan keçdikləri halda mümkündür.
Xatırladaq ki, abituriyent təsviri sənət, musiqi sənəti, memarlıq, teatr, kino və xoreoqrafiya sənəti, bədən tərbiyəsi və idman istiqamətlərinin hər hansı ikisi üzrə qeydiyyatdan keçə bilər. Ümumilikdə abituriyent seçdiyi 2 istiqamətə aid ali təhsil müəssisələrinin və tam orta təhsil bazasında orta ixtisas təhsili müəssisələrinin cəmi 6 komissiyası üzrə qeydiyyatdan keçə bilər.
