“Qaçqınkom” şəhid ailəsinə biganədir
Ölkəmizdə şəhid ailələrinə ən yüksək səviyyədə qayğı və diqqət göstərildiyini görəndə redaksiyamıza müraciət edən şəhid ailəsinin şikayətləri qarşısında donub qaldıq. Yəni bu qədər də ağır şəraitdə yaşayan şəhid ailəsi olarmı?
Təcili evlərinə yollandıq. Eşitdiklərimizdən və gördüklərimizdən sözün həqiqi mənasında dəhşətə gəldik.
İlk olaraq məlumat aldıq ki, torpaqlarımızın müdafiəsində dayanan ailənin başçısı Əbülfət Almirzəyev əvvəlcə Zəngilan, rayonun işğalından sonra isə Füzuli bölgəsində olub. Vətənə layiqincə xidmət edən əsgər 1994-cü ilin fevralın 2-də qanlı döyüşlərdə sinəsini düşmən gülləsinə sipər edərək qəhrəmancasına həlak olub. Bakı şəhərindəki II Fəxri Xiyabanda dəfn olunub.
Əbülfət şəhid olanda qızı 6 aylıq idi. Zəngilan rayonundan məcburi köçkün olan ailə – yoldaşı Xavər xanım qızı ilə onun ölümündən sonra bir müddət yataqxanada sığıınacaq tapıb. Burada da adi bir şərait olmadığından özü kimi məcburi köçkün olan qardaş-bacısının yanına gedib. Hazırda Sabunçu rayonunun Sabunçu qəsəbəsində (Natəvan küçəsi 20) qarajda yaşayır.
Şəhid ailəsinin yaşayış şəraiti son dərəcə ağırdı. Anasının yanında yaşayan Xavər xanım keçirdiyi ağır sarsıntıları kədər hissi danışır: “Bura qaraj idi, maşınları bu otaqda təmir edirdilər, hər tərəf mazuta bulanmışdı. Yaşamaq üçün yeganə yolumuz bura oldu. Dəfələrflə Qaçqınların və Məcburi Köçkünlərin İşləri üzrə Dövlət Komitəsinə müraciət etmişəm. Həmişə də deyiblər ki, qaçqınlar üçün ev tikilərsə, sizi də nəzərə alacağıq. Ancaq möhtərəm Prezidentimizin qayğısı sayəsində məcburi köçkünlərin şəraiti duradan yaxşılaşır, bizə isə bir köməklik edən yoxdur. Baxımsız vəziyyətdə bu şəraitdə yaşayırıq. Min-bir əzab içində qızımü necə böyütdüyümü isə bir Allah bilir”.
Xavər xanım bildirdi ki, sonuncu dəfə bu ilin mart ayının 1-də Qaçqınların və Məcburi Köçkünlərin İşləri üzrə Dövlət Komitəsinə gedərək mənzil üçün növbəti dəfə yazılı müraciət edib: “Ordan bildirdilər ki, 10 gün ərzində sizə ərizə ilə bağlı məlumat veriləcək. Ancaq bu günə qədər bir məlumat verilməyib”.
Məsələni araşdırmaq üçün dünən səhər Qaçqınların və Məcburi Köçkünlərin İşləri üzrə Dövlət Komitəsinin mətbuat xitməti ilə əlaqə saxlayaq şəhid ailəsinin ərizəsinin taleyi ilə maraqlanmaq istədik. Operativ məlumat verəcəklərini bildirsələr də indiyə qədər heç bir cavab yoxdur.
Mikayıl Nərimanoğlu
