“Qələbə Yolunda Jurnalistlər” sənədli filminin təqdimatı olub - FOTO - VİDEO
Bakı Dövlət Universitetində (BDU) Jurnalistika fakültəsinin təşkilatçılığı ilə “Qələbə Yolunda Jurnalistlər” sənədli filminin təqdimat mərasimi keçirilib.
Rakus.az xəbər verir ki, tədbirdə Jurnalistika fakültəsinin dekanı Vüqar Zifəroğlu, əməkdar jurnalist, professor Qulu Məhərrəmli, fakültənin Televiziya və radio jurnalistikası kafedrasının müdiri Allahverdi Məmmədli, şəhid jurnalist Məhərrəm İbrahimovun qardaşı, jurnalist Əsgər İbrahimov, şəhid jurnalist Sirac Abışovun qardaşı Şirzad Abışov, eləcə də universitetin müəllim, professor və tələbə heyəti iştirak edib.
Təqdimat mərasimində Vətən yolunda canlarından keçmiş bütün şəhidlərin xatirəsi bir dəqiqəlik sükutla yad olunub.
Sənədli film media nümayəndələrinin Qarabağda göstərdikləri şücaət, şəhid jurnalistlər Məhərrəm İbrahimov və Sirac Abışovun fəaliyyətindən və fədakarlığından bəhs olunur.
Təqdimat barəsində təəssüratlarını bölüşən V.Zifəroğlu, Q.Məhərrəmli, A.Məmmədli və digər qonaqlar belə bir layihəninin həyata keçirilməsinin yeni nəsil yetişən jurnalistlərin həyatında mühüm rol oynayacağına və şəhidlərimizin heç zaman unudulmayacağına işarə olduğunu bildiriblər.
Onlar jurnalistikanın çətin, amma şərəfli peşə olduğunu vurğulayaraq, İkinci Qarabağ müharibəsində media təmsilçilərinin üzərinə düşən vəzifəni şərəflə yerinə yetirdiklərini, sənədli filmin qəhrəmanlarının peşə fəaliyyətini şərəflə yerinə yetirərkən şəhidlik zirvəsinə ucaldıqlarını söyləyiblər. Bildirilib ki, bu film hərbi vətənpərvərlik sahəsində yetişən hər bir jurnalist üçün xüsusi əhəmiyyət daşıyır.
Çıxış edən Əsgər İbrahimov və Şirzad Abışov filmin ərsəyə gəlməsində əməyi keçən hər kəsə təşəkkür edərək, belə layihələrin davamlı olmasını arzulayıb, bu ekran işinin gənclərin vətənpərvərlik ruhunda böyüməsi üçün bir vasitə olacağını ifadə ediblər.
Tədbirdə AzTV-nin əməkdaşları Vüsal Qaraca və Samir Oruc şəhid jurnalistlərlə bağlı xatirələrini bölüşüb və sənədli filmin ərsəyə gəlməsində zəhməti olan şəxslərə təşəkkürlərini bildiriblər.
Daha sonra filmi ərsəyə gətirən fənn müəllimi Günel İlqar və ikinci kurs tələbələri dəvəti qəbul edib təqdimat mərasiminə gəldikləri üçün iştirakçılara minnətdarlıq ediblər.
Sonra iştirakçılar “Qələbə Yolunda Jurnalistlər” sənədli filminə baxıb, xatirə şəkili çəkdiriblər.
