Qıpçaq, türk və hun tarixi Azərbaycanda araşdırılır - FOTO
Dünyadakı qədim qıpçaq, türk və hun tarixini geniş araşdıran qazaxıstanlı alimlərdən ibarət ekspedisiya fəaliyyətlərini davam etdirir.
Rakus.az xəbər verir ki, Qazaxıstanın xalq qəhrəmanı, ordu generalı Sadaqat Nurmaqambetovun adını daşıyan beynəlxalq ictimai-xeyriyyə fondunun təşkil etdiyi ekspedisiya 2 ildir ki, araşdırma ilə məşğuldur. Aparılan tədqiqat işinin sonunda Qazaxıstan televiziyası tərəfindən qədim qıpçaq, türk və hun tarixindən bəhs edən sənədli film də hazırlanacaq. Hazırda alimlər Azərbaycandadır. Ekspedisiya ölkəmizə gəlməmişdən əvvəl Gürcüstanın azərbaycanlıların yaşadığı Borçalı mahalında olublar. Alimlər Borçalıdan sonra Qazax rayonuna və Gəncəyə gediblər.
Ekspedisiyanın qrupunun başçısı Sapar İskakov Azərbaycana ikinci dəfə, Gürcüstanın azərbaycanlılar yaşadığı ərazilərinə isə artıq 3-dəfə səfər etdiklərini deyib.
S.İskakovun sözlərinə görə, bu 2 ildə çox maraqlı faktlar əldə edilib. Azərbaycan qədim hun və türk tayfalarının yaşadığı bir məkan olduğunu deyən ekspedisiya rəhbəri əlavə edib ki, burda XII-XIII əsr abidələri də var, eramızdan əvvəl və eramızın II-III-IV- əsrlərinə aid Alban abidələri də var ki, hətta bu gün belə Azərbaycan ərazilərində qorunub saxlanılır. O qeyd edib ki, Qazax rayonunda Qıpçaqlar və Cəlillər qəsəbələrində olublar. Həmin ərazilərdə tarixi mənbələr və izlər kifayət qədərdir.
Ekspedisiyanın rəhbəri indiyədək 40-dan çox ölkədə olduqlarını bildirib. Onun sözlərinə görə, elə ölkələr var ki, təkrar səyahət edərək yeni tarixi faktlar əldə ediblər.
Xatırladaq ki, qazaxıstanlı alimlər Bakıdan Naxçıvana yola düşəcək, daha sonra ekspedisiyanı İranda davam etdirəcəklər.
