QTA Mingəçevirdə tədbir keçirdi
Qida Təhlükəsizliyi Agentliyi sahibkarların maarifləndirilməsi ilə əlaqədar növbəti tədbiri Mingəçevirdə keçirib.
Rakus.az xəbər verir ki, Agentliyin informasiya təminatı və innovativ həllər şöbəsindən verilən məlumata görə, tədbirdə iştirak edən sahibkarlara agentliyin fəaliyyət istiqamətləri, o cümlədən qida sahəsində fəaliyyət göstərən sahibkarlıq subyektlərinin qida təhlükəsizliyi qeydiyyatına alınması qaydaları haqqında ətraflı məlumat verilib. Bildirilib ki, qeydiyyatdan keçən subyektlər daim nəzarətdə saxlanılır və onlarla sıx əməkdaşlıq edilir.
Müasir standartlara cavab verən kəsim məntəqələrinin yaradılması, bu istiqamətdə fəaliyyət göstərən sahibkarlara metodiki dəstək göstəriləcəyi iştirakçıların diqqətinə çatdırılıb. Tədbirdə Qida Təhlükəsizliyi İnstitutunun göstərdiyi xidmətlər barədə də sahibkarlara geniş məlumat verilib.
Görüşdə qida zəncirinin bütün mərhələlərində fəaliyyət göstərən sahibkarlıq subyektlərinin və qida məhsulları istehlakçılarının maarifləndirilməsi işinin bundan sonra da davam etdiriləcəyi bildirilib.
Tədbirdə sahibkarları maraqlandıran suallar cavablandırılıb və onların qarşılaşdıqları problemlərin həlli istiqamətində fikir mübadiləsi aparılıb.
