Rakus.az-ın qaldırdığı PROBLEM həll olundu - FOTO - VİDEO
May ayının 27-də Rakus.az-da dərc olunan “İsmayıllının Zərnava kəndində PUL insandan önəmlidir” başlıqlı yazıda bu kənddə baş verən ciddi qanun pozuntuları konkret faktlarla – foto və video görüntülərlə tənqid edilmişdi.
İsmayıllı rayon İcra Hakimiyyətinin başçısı Mirqamət Sadıqov redaksiyamızla telefon əlaqəsi yaradaraq tənqidi yazıya görə yaradıcı kollektivə minnətdarlığını bildirdi. Qeyd etdi ki, bununla əlaqədar olaraq gün ərzində ciddi araşdırma aparılacaq və nəticəsi barədə sizə məlumat veriləcək.
Rayon icra hakimiyyəti tərəfindən redaksiyamızın elektron ünvanına rəsmi məktub daxil oldu. Məlumatda eyni vaxtda körpüdən 5 nəfərin istifadə etməsinə icazə verildiyi halda video və fotodan göründüyü kimi körpüdə 10-dan çox adam var.
Cavab məktubunu və Zərnava bələdiyyəsi sədrinin məlumatını olduğu kimi nəzərinizə çatdırırıq.
Rakus.az saytının rəhbərliyinə
Hörmətli sayt rəhbəri!
Zərnava körpüsü ilə bağlı yaranmış problemin ardan qaldırılması üçün mövcud vəziyyəti faktlarla işıqlandırdığınız üçün Sizə təşəkkürümüzü bildiririk.
Məlumat üçün bildiririk ki, körpü Zərnava bələdiyyəsinin balansındadır. Sizin “İsmayıllının Zərnava kəndində PUL insandan önəmlidir” başlıqlı yazınız ilə tanış olduqdan sonra bələdiyyənin sədri Afaq Məhərrəmova İcra Hakimiyyətinə dəvət olunaraq problemin aradan qaldırılması üçün təxirəsalınmaz tədbirlər görülməsi tövsiyə olunmuşdur. Bələdiyyə sədri A.Məhərrəmova promlemin aradan qaldırıldığı haqqında İcra Hakimiyyətinə rəsmi məlumat vermişdir. A.Məhərrəmovaya gələcəkdə də hər hansı hadisənin baş verməməsi üçün körpünün yük götürmə qabiliyyətinin dəqiq yoxlanılması ilə əlaqədar rəsmi təşkilatların rəyinin alınması məsləhət görülmüşdür.
Bələdiyyənin rəsmi məlumatı əlavə olunur.
Xahiş edirik nəzərə alasınız.
İsmayıllı Rayon İcra Hakimiyyəti başçısı aparatının
İnformasiya təminatı və təhlil sektoru
