Rizvan Nəbiyev: “Abşeronlu gənclərin xaricdə təhsil almasına nail olmalıyıq”
Sentyabrın 1-nə təyin edilmiş Azərbaycan Respublikasının Milli Məclisinə növbədənkənar seçkilərdə 49 saylı Abşeron ikinci seçki dairəsindən deputatlığa bitərəf namizəd Rizvan Nəbiyev seçicilərlə görüşlərini davam etdirir.
Rakus.az xəbər verir ki, Rizvan Nəbiyev avqustun 28-də seçkiqabağı təşviqat çərçivəsində Abşeron rayonunda seçicilərlə növbəti görüşünü keçirib. Görüşdə ictimaiyyət nümayəndələri ilə yanaşı, gənclər və idmançılar, eləcə də idmansevərlər iştirak ediblər.
R.Nəbiyev Seçki Platformasında yer alan müxtəlif məsələlər, o cümlədən rayonun dayanıqlı və təmiz inkişafına yönəlmiş hədəflər barədə çıxış edib.
O, tədbirdə dövlət tərəfindən Azərbaycanda idmanın inkişafına ayrılan diqqət və qayğıdan, idmançılarımızın Paris Olimpiadasındakı uğurlarından danışıb, ölkəmizə daima qələbə sevincini yaşadan idmançılarımıza, təhsil və elm sahəsində yeni-yeni uğurlara imza atan gənclərimizə bir daha müvəffəqiyyətlər arzulayıb.
R.Nəbiyev çıxışında gənclərin daha yüksək təhsilə yiyələnməsi ilə bağlı Seçki Platformasında hədəf götürdüyü məsələlərdən də söz açıb. Onun bu barədə çıxışı gənclərin təhsili sahəsində beynəlxalq əməkdaşlığın genişləndirilməsi, xaricdə təhsil məqsədi ilə təqaüd imkanlarının təşviqi, xarici dil biliklərinin artırılması və s. mövzuları əhatə edib.
Deputatlığa namizəd deyib ki, Abşeronlu gənclərin xaricdə daha çox təhsil almasına nail olmalıyıq.
O, qaçqınlıqdan diplomatiyadək keçdiyi həyat yolunda təhsilin oynadığı rolu xüsusi vurğulayıb, eyni zamanda, gənclərin asudə vaxtlarını sağlam və səmərəli keçirməsi üçün müxtəlif məkanların – futbol meydançaları və s. yaradılmasına nail olunmasının önəminə toxunub.
Səmimi mühitdə keçirilən görüşün sonunda R.Nəbiyev seçiciləri diqqətlə dinləyib, sonra onların təklif və müraciətləri əsasında fikir mübadiləsi aparılıb.
Növbədənkənar parlament seçkilərində aktiv iştirak edəcəklərini söyləyən seçicilər layiqli namizəd Rizvan Nəbiyevə səs verəcəklərini bildiriblər.
Xatırladaq ki, 2024-cü il sentyabrın 1-də Azərbaycan Respublıkası Milli Məclisinin VII çağırış deputatlarının seçilməsi üçün növbədənkənar parlament seçkiləri keçiriləcək. Majoritar seçki sistemi ilə keçirilən seçkilərdə Azərbaycan Milli Məclisinin 125 deputatının seçilməsi nəzərdə tutulub.
