Rizvan Nəbiyev: “Şagird-millət vəkili dialoqu müsbət nəticələr verə bilər”
Sentyabrın 1-nə təyin edilmiş Azərbaycan Respublikasının Milli Məclisinə növbədənkənar seçkilərdə 49 saylı Abşeron ikinci seçki dairəsindən deputatlığa bitərəf namizəd Rizvan Nəbiyev seçicilərlə görüşlərini davam etdirir.
Rakus.az xəbər verir ki, Rizvan Nəbiyev avqustun 26-da seçkiqabağı təşviqat çərçivəsində Abşeron rayonu, Xırdalan şəhərində seçicilərlə yaddaqalan görüş keçirib.
O, çıxışı zamanı ənənəvi olaraq seçiciləri Seçki Platforması ilə tanış edib və hədəf götürdüyü məsələlərlə bağlı onları məlumatlandırıb.
Deputatlığa namizəd seçicilərin etimad göstərəcəyi təqdirdə Abşeronda aktual məsələlərin həllinə qanunvericilik çərçivəsində dəstək verilməsi üçün çalışacağını söyləyib.
R.Nəbiyev Qalib Azərbaycanın tərəqqisi naminə hər kəsi məsul olduğu sahə üzrə daha inamla çalışmağa dəvət edib və bir daha vurğulayıb ki, hər zaman seçici ilə millət vəkili arasında davamlı və səmimi dialoq qurulmasının tərəfdarı olacağam: “Bunun üçün seçicilərinin səsinə və dəstəyinə ehtiyac duyulur”.
Səmimi mühitdə keçirilən görüşdə seçicilər R.Nəbiyevi dəstəklədiyini və ona etimad göstərəcəklərini bildiriblər.
Rizvan Nəbiyev özünün feysbuq səhifəsində görüşlə bağlı təəssüratlarını yazıb: “Bu dəfə də seçicilərlə görüşümdə iştirak edən müəllimlərlə həmsöhbət olmaq imkanımız yarandı. Təklif etdik ki, deputat seçiləcəyim təqdirdə mütəmadi olaraq məktəblərdə şagirdlərlə dialoqlar həyata keçirə bilərik. Düşünürəm ki, şagird-millət vəkili dialoqu bu istiqamətdə müsbət nəticələr verə bilər. Pedoqoji fəaliyyətlə məşğul olduğumu nəzərə alsaq, müəllimlik mənim üçün həmişə doğma peşə olub. Bu müqəddəs peşənin sahiblərindən xeyir-dua almaq isə mənə əlavə ruh verir”.
