Şamaxıda AÜŞF-nın rəsmi açılış mərasimi oldu - FOTO
Avqustun 30-da Şamaxı rayonunun Meysəri kəndindəki “Şirvan şərabları” MMC-nin üzümçülük və şərabçılıq kompleksində keçirilən Azərbaycan Üzüm və Şərab Festivalının açılış mərasimi olub.
Rakus.az xəbər verir ki, Heydər Əliyev Fondunun dəstəyi, Kənd Təsərrüfatı Nazirliyi, Şamaxı Rayon İcra Hakimiyyəti, “Regional İnkişaf” İctimai Birliyi, Dövlət Turizm Agentliyi və Azərbaycan Milli Xalça Muzeyinin birgə təşkilatçılığı ilə keçirilən festivalın əsas məqsədi yerli üzüm və şərab istehsalının təşviqi, şərab məhsullarının ixrac potensialının artırılması, Azərbaycanda şərab istehsalı tarixinin geniş ictimaiyyətə çatdırılmasıdır.
Mərasimdə qonaqları şərabçılıqla bağlı al-əlvan geyimli müxtəlif personajlar qarşılayıb. Tədbirdə Şamaxı rayon İcra Hakimiyyətinin başçısı Tahir Məmmədov, kənd təsərrüfatı naziri İnam Kərimov, Azərbaycan Şərab İstehsalçıları və İxracatçıları Assosiasiyasının sədri Elçin Mədətov çıxış edərək Azərbaycanda qədim üzümçülük və şərabçılıq ənənələrinin mövcud olmasından, son illər ölkəmizdə böyük üzüm plantasiyalarının salınmasından, yeni müasir şərab istehsalı zavodlarının fəaliyyətə başlamasından, bu sahənin inkişafına olan dövlət dəstəyindən danıışıblar. Qeyd edilib ki, ötən əsrin 70-80-ci illərində Şamaxıda 27 min hektar üzüm bağı olub və hər il 240 min tondan çox məhsul istehsal edilib. Ölkəmizin müstəqilliyinin ilk illərində bu sahə diqqətdən kənar qalıb və üzüm bağları məhv olub. Son illər rayonda yenidən bu sahənin inkişafı üçün böyük tədbirlərə start verilib. Hazırda rayonda 1700 hektar üzüm bağı var. Şamaxıda üzümçülüyün inkişafı üçün son illlər böyük işlər görülür, yerli əhalinin və sahibkarların bu sahəyə marağı artıb. Bu festivalın qədim üzümçülük rayonu olan Şamaxıda keçirilməsinin rəmzi mənası var. Şamaxının Meysəri və Mədrəsə kəndlərində yetişdirilən yerli sort üzümlər həmişə Azərbaycanda məşhur olub, xarici ölkələrə ixrac edilib.
Çıxışlardan sonra rəsmi qonaqlar, turistlər Azərbaycanın bölgələrində fəaliyyət gööstərən üzüm emalı və şərab istehsalı zavodlarının nümayiş etdirdiyi müxtəlif çeşidlli üzümlər və onlardan hazırlanan şərablarla tanış olublar. İki gün davam edəcək festival çərçivəsində proqrama uyğun olaraq üzüm istehsalı və şərabçılıq, ölkənin turizm potensialı ilə bağlı müxtəlif maarifləndirici və əyləncəli tədbirlər keçirilir. Tədbir çərçivəsində beynəlxalq və yerli ekspertlərin iştirakı ilə somalye kursları da təşkil olunur. Qonaqlar üzüm, şərabçılıq və festivalın rəmzləri olan çeşidli dekorasiyalar, instalyasiyalar ilə bəzədilən ərazidə yerli şərab istehsalçılarının dequstasiya pavilyonları, həmçinin qastronomik və etno zonalar ilə tanış olurlar. Burada Azərbaycanın ayrı-ayrı bölgələrinə məxsus xalq sənəti növlərinə–misgərlik, xalçaçılıq, şəbəkə, dulusçuluq kimi müxtəlif sahələrə aid yaradıcılıq nümunələri, onların hazırlanması prosesi, milli mətbəx mədəniyyəti və musiqiləri təqdim edilir. Festivala ev sahibliyi edən Şamaxı xüsusi guşə ilə təmsil olunur. Tədbirdə iştirak edən şərab istehsalçıları öz müəssisələri barədə təqdimatlarla çıxış edib, məhsullarının dequstasiyasını keçirirlər.
Ərazidəki nəhəng butulkalar yerli şərab istehsalçılarının hər birinin məhsullarını təcəssüm etdirir. Bundan əlavə şərab şüşəsi tədbirdə həm də yaradıcılıq obyekti kimi istifadə olunur; iştirakçılar butulkaları arzu etdikləri tərzdə və rəngdə boyayır, yaradıcı fantaziyalarını reallaşdırırlar. Ərazidə Azərbaycanın kənd təsərrüfatı məhsullarının yarmarkası da təşkil edilib.
İştirakçılar və şərab istehsalçıları üçün oyun və viktorinalar keçirilir, qaliblərə hədiyyələr təqdim olunur. Festivala ailəvi qatılan iştirakçıların övladları uşaq əyləncə zonasında vaxtlarını maraqlı keçirirlər. Burada onlar mini zooparkda heyvanlarla tanış olur, müxtəlif viktorina və ustad dərslərində iştirak edirlər. “İnadkarın ram edilməsi” filmindən Adriano Çelentanonun rəqs səhnəsi çoxlarının yaddaşına üzümün ayaqla sıxılmasını–Avropada əvvəllər şərabın hazırlanma prosesini maraqlı və əyləncəli bir məşğuliyyət kimi yazıb. İştirakçılar festivalda bu zövqü də yaşayırlar.
Festivalın rəsmi açılış mərasimindən sonra musiqili proqram təqdim edilib. Açılış mərasimində “Natiq” ritm qrupu, “Mirvari rəqs qrupu” üzüm mövzusunda xüsusi musiqili kompozisiya təqdim edib, xalq artisti Samir Cəfərov çıxış edib.
Rəqqas və nağaraçıların, nəfəsli alətlər orkestri, eləcə də festivalın emblemi olan fiqur və kuklaların iştirakı ilə parad təşkil edilib. Sonra mərasimdə müxtəlif musiqi proqramları, o cümlədən Xalq artisti Aygün Kazımovanın iştirakı ilə konsert təqdim olunub, diskoteka təşkil edilib. Kompleks ərazisindəki göldə işıqların şousu nümayiş edilib. (apa.az)
