Şəhid Jurnalistlərin Xatirəsinə 3-cü Ənənəvi Minifutbol Turniri başa çatıb - FOTO - VİDEO

Tədbirin təşkilatçısı, Rakus.az saytının təsisçisi, şəhid jurnalist Məhərrəm İbrahimovun qardaşı, jurnalist Əsgər İbrahimov sentyabrın 14-dən start götürən turnirin nəhayət başa çatdığını söyləyib: “Qalibləri təbrik edirəm. Xeyirli, uğurlu olsun. Düşünürəm ki, bu yarış Azərbaycanda futbolun inkişafına müəyyən qədər töhfə verə bildiniz. Səmimi, mehriban, baxımlı futbol nümayiş olundu. Bu turnir ənənəvi olaraq davam edəcək və gələcək illərdə bu yarışın statusunun genişləndirilməsi nəzərdə tutulur. Çox istəyirik ki, bu turnirə beynəlxalq status da qazandıraq. Belə ki, işğaldan, terror qurbanı olan şəhid jurnalistlərin sayı çoxdur. Həmin ölkələrdən komandaların dəvət olunması, dost ölkələrdən jurnalist heyətlərin iştirakı gələcək planlarımızda var. Bundan əlavə, indi işğaldan azad olunan torpaqlarımızda böyük quruculuq işləri gedir, yeni ağıllı kənd, qəsəbə, rayon, şəhərlər salınır. Növbəti dəfə turnirin oyunlarını şəhid jurnalistlərimizin torrora məruz qalaraq şəhid olduqları məkanlarda keçirməyi də düşünürük. Bir sözlə, turnirin miqyası daha da böyüyəcək və biz inşallah növbəti turnirimizi Qərbi Azərbaycanda da keçirəcəyik”.

Ə.İbrahimov turnirin yüksək səviyədə başa çatması üçün göstərdikləri təşəbbüsə və iştiraka görə əməyi olan hər kəsə bir daha təşəkkür edib, mərasimin reqlamentinə əsasən hörmətli qonaqların çıxışlarından sonra qaliblərə kubok, medal, xatirə hədiyyələrinin təqdim olunacağını söyləyib.

xxx

Milli Məclisin deputatı Rizvan Nəbiyev turnirin təşkilinə görə təşəkkür edib, belə tədbirlərin əhəmiyyətindən danışıb: “Axşamınız xeyir olsun, hamınızı salamlayıram. İlk növbədə, bizim hörmətli futbolçularımızı alqışlayıram. Mən “Göyçə” komandasını ürəkdən təbrik edirəm. Onlar birinci yerə layiqli şəkildə yüksəldilər. Eyni zamanda demək istəyirəm ki, bu görüşün, bu çempionatın qalibi hər zaman dostluqdur. İnşallah, bu çempionatı Qərbi Azərbaycanda keçirəcəyik. Hər birinizi bir daha təbrik edirəm”.

xxx

Futbol mütəxəssisləri və veteranı Maşallah Əhmədov şəhidlərimizə Allahdan rəhmət diləyib, turnirin onların xatirəsinə həsr olunmasını yüksək dəyərləndirib: “Bu gün iki oyun keçirildi. Hər ikisi çox maraqlı idi. Mən baxımlı oyun nümayiş etdirən komandaları təbrik edirəm. Şəhidlərin xatirəsinə keçirilən idman tədbirləri onların adının daim yaşadılmasına xidmət edir. Belə turnirlərin davam etdirilməsi çox vacibdir. Bu gün turnirin “ən yaxşı oyunçu”sunu və “ən yaxşı qapıçı”nı seçmək funksiyasını da yerinə yetirmişik və Təşkilat Komitəsi elan edəcək”.

xxx

Beynəlxalq dərəcəli hakim-inspektor Asim Xudiyev turnirin təşkilatçılarına və iştirakçılarına təşəkkür edərək şəhidlərimizə Allahdan rəhmət diləyib, idmanyönlü layihələrin daim dəstəklənməsinin faydalı olduğunu deyib, qaliblərə uğurlar arzulayıb: “Biz burada gənc futbolçuların idmana, futbola sevgisini gördük. Hesanb edirəm ki, futbol onların həyatda qismətidir. Fürsətdən istifadə edib, onlara cansağlığı arzu etmək istəyirəm. Əminəm ki, bu turnir ənənəvi olaraq qalacaq və biz gələn il bu turnirin açılışında canla, başla iştirak edəcəyik. Qoy, hər zaman qəlblərimiz futbolla döyünsün”.

xxx

Futbol mütəxəssisləri və veteranı Asif Əliyev deyib ki, turnirin iştirakçılarını və təşkilatçılarını ürəkdən təbrik edirəm: “Siz Azərbaycanın bütövlüyü uğurunda şəhid olan oğulların, eləcə də jurnalistlərin əzizi xatirəsinə təşkil olunana Ənənəvi Futbol Turniri təşkil edirsiniz. Sizin bu işiniz bizim gələcəyimzi olan gənclər üçün nümunədir. Belə tədbirlər onların gələcəkdə yaxşı futbolçu kimi böyüməsinə təsir göstərir. Allah şəhidlərimizə rəhmət eləsin, qazilərimizə cansağlığı versin. Qalibləri təbrik edirəm. sağ olun”.

xxx

Göyçə mahalının Nərimanlı Kənd İcmasının sədri, Azərbaycan Tibb Universitetinin müəllimi, həkim Şirazi İbrahimov iştirakçıları salamlayıb qalibləri təbrik edib: “Əziz futbolçularımız, qonaqlarımız, tamaşaçılarımız və ümumən idmansevərlər, hər birinizi ürəkdən salamlayıram. Turnirə qatılan bütün komandalara və təşkilatçılara öz təşəkkürümü bildirirəm. Final oyunu da gözlənildiyi kimi çox gözəl və həyacanlı oldu. Hər iki komanda birinciliyə layiq oyun göstərdilər. Sonda “Göyçə” komandasının əzmkarlığı öz bəhrəsini verdi və çempionluğu qazandılar. Bu komandanın turnirə qatılmasını Rizvan qardaşımızdan mən xahiş etdim və inanırdım ki, qalib olacaqlar. Belə də oldu. Uğurları davamlı olsun. İnanıram ki, Ali Baş Komandanımızın və qalib Ordumuzun sayəsində biz bu yarışları doğma Qərbi Azərbaycanımızda, İrəvanda, Göyçədə də keçirəcəyik. Şəhidlərimizə allah rəhmət eləsin, qazilərimizə cansağlığı versin”.

xxx

Çaykənd İcmasının sədri Əflatun Abdullayev turniri yüksək qiymətləndirərək, qalib komandaları təbrik edib: “Axşamınız xeyir olsun əziz futbolsevərlər. Bu gün çox gözəl gündür. “Göyçə” komandası qələbə çaldı. Mən bu turnirin aşılışında da iştirak etmişdim və oyunçulara demişdim ki, bir-biri ilə mehriban, dost kimi oynasınlar.  Turnirin yaxşı keçməsinin bir əlaməti də o oldu ki, iştirakçılar səmimi və mədəni oyun nümayiş etdirdilər. Heç bir kobudluğa, xəsarətə yol verilmədi. Hamınıza təşəkkür edirəm. Əsgər müəllim, birinci sizə təşəkkür edirəm ona görə ki, sən bizim şəhid jurnalistlərimizi yad edir, onların xatirəsinə turnir keçirirsiniz. İkincisi də bizim gənc futbolçularımızı, gündəlik futbolla məşğul olan insanlar yaşından asılı olmayaraq hamısı bir-birini tanıyır. Hər birinizə təşəkkür edirəm. Əziyyət çəkib gəlib burada iştirak edirsiniz. Zəhmətinizi halal edin. Bütün iştirakçıları və mükafatçıları təbrik edirəm”.

xxx

M.Ə.Rəsulzadə qəsəbə Bələdiyyəsinin sədri Hümbət Hüseynov futbolsevərləri və qonaqları salamlayaraq, 3 ildir keçirilən Futbol Turnirinin artıq ənənəyə çevrildiyini deyib: “Şəhidlərimizin ruhları şad olsun. Məkanları cənnət olsun. Hər bir işin əvvəli olduğu kimi sonluğu da olur. Təbii ki, sonda da bir qalib olur. Burada final oyununu izlədik. Bu gün istəyirdim “Ardanış” komandası qalib gəlsin, nail ola bilmədik. Amma onu demək istəyirəm ki, Ardanış da, Göyçə də, Qərbi Azərbaycan da bizimdir. Turnirdə iştirak edən həfəskar futbolçulara bundan sonra da uğurlar arzulayıram. “Göyçə” komandasını təbrik edirəm, uğurlarınız bol olsun, səsiniz hər zaman daha yüksəkliklərdən gəlsin. İştirakçı komandalara gələcəkdə bol şanslı qələbələr diləyirəm”.

xxx

Ardanış Kənd İcmasının İdarə Heyətinin üzvü, müəllim Sahib Əhmədov iştirakçıları salamladı, turnirin şəhid jurnalistlərin xatirəsinə keçirilən və ənənəvi xarakter aldığını bildirib: “Allah bütün şəhidlərimizə rəhmət eləsin. Fytbol mənim yaralı yerimdir. Mən də qalib komandanı təbrik edirəm. Birinci, ikinci və üçüncü yeri tutan komandalara uğurlar arzulayıram. Futbolun gözəlliyi yaxşı oyundu, qol vurmaqdır. Emosiyalara qapılmamaq, yaxşı oyun göstərib azarkeşləri sevindirməkdir. Hər birinizə uğurlar arzulayıram. Futbol hər birimizin uşaqlıq illərinin ən gözəl oyunu olub. Bu gün veteran futbolçuların bu turnirə qatılması xüsusi rəng və fərqlilik qatır. Tamaşaçıların da bu yarışa göstərdikləri marağı böyükdür. Burada təmsil olunan komandaların jurnalistlərdən, gənclərdən, veteranlardan, hərbçilərdən olması, tarixi yurd yerlərimizin, kəndlərimizin adını daşıması çox yaxşı idman siyasətidir. Mən iştirakçılara uğurlar arzulayır, qalibləri bir daha təbrik edirəm”.

xxx

Futbol məşqçisi Vüqar Hacıyev finalda oynayan “Göyçə” və “Ardanış” komandalarını təbrik edib: “Finala kimi gəlib çatmağın özü bir qalibiyyətdir. Xatirələri qəlbimizdə əziz olan Şəhid jurnalistlərimizə Allahdan rəhmət diləyirəm. Bu turnirin təşkilatçılarına da təşəkkür edirəm ki, belə bir möhtəşəm turnir keçirdilər. “Göyçə “komandasının çempiyon olmasına görə bütün Qərbi azərbaycanlıları təbrik edirəm”.

xxx

Qeyd edək ki, Rakus.az saytının təşkilatçılığı, Bakı Tennis Akademiyasının dəstəyi ilə keçirilən turnirin məqsədi Birinci və İkinci Qarabağ savaşında canlarını fəda etmiş mərd mübarizlərin, eləcə də 44 günlük Vətən müharibəsi iştirakçılarının qəhrəmanlıq nümunələrini yaşatmaq, şəhid jurnalistlər Məhərrəm İbrahimov və Sirac Abışovun timsalında erməni terrorunun qurbanı olan media nümayəndələrimizin – Çingiz Mustafayevin, Kazımağa Kərimov, Osman Mirzəyev, Alı Mustafayev, Fəxrəddin Şahbazov, Arif Hüseynzadə və Salatın Əsgərovanın əziz xatirəsini anmaq, yeni nəslin sağlam ruhda, vətənpərvər böyüməsinə töhfə verməkdir. İldə bir dəfə təşkil olunan turnirin ilk ilində,  yəni 2022-ci ildə 6 komanda, 2023-cü ildə 8 komanda, 2024-cü ildə isə 12 komanda – “Ardanış, AzTv, AZƏRTAC, BAKU.WS, “Report” “Nərimanlı”, “Veteranlar”, “Turan”,  “Hərbçilər”, “Gənclər 2020”, “Qoşabulaq” və “Göyçə” adı altında mübarizə aparıb. Turnirdə Azərbaycan mediasını 4 komanda – AzTv, AZƏRTAC, BAKU.WS və “Report” təmsil edib. Turnir hər birində 3 komanda olmaqla 4 qrupdan ibarət olub, sentyabrın 14-də başlayıb oktyabrın 19-da başa çatıb. Qruplar üzrə xal və top hesabına 1 və 2-ci yeri tutan komandalar 4/1-ə yüksəlib. Bu  oyunlarında iştirak edən 8 komandadan qalib gələn 4 komanda yarımfinala çıxıb. Yarımfinalda A1-in qalibi D1-in, B1-in qalibi C1-in qalibi ilə görüşüb və qalib gələnlər FİNAL-a çıxıb, məğlublar isə 3-cü yer uğurunda mübarizə aparıb. Oyunları AFFA hakimlərinin idarə edib. İştirakçılar arasında 44 günlük Vətən müharibəsi zamanı ön cəbhələrdən şəhid həmkarları kimi operativ xəbərlər, reportajlar hazırlayan jurnalistlər də olub.

“Mister Tum”, “Bee Tours” şirkətlərinin tərəfdaşlığı ilə keçirilən Ənənəvi Xatirə Turnirinə informasiya dəstəyini AzTv, Baku TV, CBC Sport, MTV Azərbaycan telekanalları, AZƏRTAC, “Report” İnformasiya Agentliyi, BAKU.WS portalı, Rakus.az və Manşet.az saytaları verib.

Osman Mirzəyev 1937-ci ildə dünyaya göz açıb. O.Mirzəyevin peşəkar jurnalist bacarığı təkcə mətbuatda deyil, həm də televiziyada özünü büruzə verirdi. O, Azərbaycan televiziya məkanında ilk bədii-publisistik, ictimai-siyasi “Dalğa” verilişinin yaradıcılarından idi. 1990-cı ilin sentyabrında Osman Mirzəyev Azərbaycan Respublikası Prezident Apparatının şöbə müdiri vəzifəsinə təyin olunub. 20 noyabr 1991-ci ildə Xocavənd rayonu yaxınlığında, bir sıra digər dövlət xadimi ilə birgə içində olduğu Mi-8 vertolyotunun ermənilər tərəfindən vurulması nəticəsində şəhid olub.

Alı Mustafayev 1952-ci il 14 apreldə Qazax rayonunun Qazaxbəyli kəndində anadan olub. Azərbaycan Dövlət Universitetinin Jurnalistika fakültəsində təhsil alıb. Təyinatı Azərbaycan Televiziya və Radio Verilişləri Şirkətinə verilib və ömrünün sonunadək AzTV-də işləyib. Erməni işğalçılarının Azərbaycana hücumu dövründə Dağlıq Qarabağdan – qaynar nöqtələrdən, eləcə də yüksək dövlət səviyyəli rəsmi görüşlərdən hazırladığı müsahibə və reportajlarla rəğbət qazanıb. 1991-ci ildə “İlin ən yaxşı jurnalisti” mükafatına layiq görülən Alı Mustafayev həmin il noyabrın 20-də Xocavəndin Qarakənd kəndi yaxınlığında sülhməramlı nümayəndələri aparan vertolyotun ermənilər tərəfindən vurulması nəticəsində şəhid olub.

Kazımağa Möhsün oğlu Kərimov Bakı Dövlət Universitetinin Jurnalistika fakulətisini bitirdikdən sonra peşəsinin arxasınca gedərək bir müddət “Azərbaycan məktəbi” jurnalında, sonra isə “Azərbaycan müəllimi” qəzetində çalışıb. 1988-ci ildə doğma vətəninin üzərini qara buludlar alanda heç vaxt haqsızlıqla, ədalətsizliklə barışmayan Kazımağa da silaha sarılıb. 1992-ci ilin 12-13 iyun tarixlərində Şamuyankənd rayonunun azad olunması uğrunda həyata keçirilən əməliyyatda ağır yaralanıb. Aldığı yaranın ağır olmasına baxmayaraq, əməliyyatın sonunadək iştirak edən Kazımağa döyüşlər bitdikdən sonra Bakı şəhərində yerləşən Hərbi Hospitala çatdırılıb. Kazımağa 15 iyun 1992-ci ildə şəhidlik zirvəsinə ucalıb.

Arif Hüseynzadə – 1991-ci il noyabrın 20-də  Xocavənd rayonunun Qarakənd kəndinin yaxınlığında Azərbaycana məxsus “Mi-8” hərbi vertolyotu erməni silahlı quldurları tərəfindən vurulub. 20 noyabr faciəsi nəticəsində Azərbaycanın bir sıra dövlət məmurları, millət vəkilləri həlak oldular. Onlar içərisində AzTV-də işıqçı kimi fəaliyyət göstərən Arif Hüseynzadə də vardı.

Azərbaycanın Milli Qəhrəmanı, jurnalist Salatın Əsgərova 1991-ci ilin 9 yanvarında Laçından Şuşaya yollanarkən, Qaladərəsi kəndi yaxınlığında Ermənistan silahlı qüvvələri tərəfindən amansızcasına qətlə yetirilir. Salatın Əsgərova Azərbaycanın ilk şəhid qadın jurnalistidir. İxtisasca geofizik olsa da, jurnalistikaya olan sevgi onu bu sahəyə gətirmişdi. O, reportajlarında Azərbaycanın ərazi bütövlüyü ilə bağlı məsələlərə geniş yer verirdi. 1992-ci il noyabrın 6-da Salatın Əsgəroavaya ölümündən sonra “Azərbaycanın Milli Qəhrəmanı” adı verilib.