Rakus.az xəbər verir ki, bunu qəzaya düşərək həlak olan pilot Rəşad Atakişiyevin qayınatası, politoloq Qabil Hüseynli deyib.
Bildirib ki, pilotun 7 yaşlı oğlu ara-sıra suallar verərək atasının harada olmasını soruşur. Sanki atasının həyatda olmamasını hiss edir:
“Hər dəfə atasını, onun harada olduğunu soruşur, onunla görüntülü danışmağı tələb edir. Balaca övladı da tez-tez atasını soruşur. Həqiqətləri onlara deyə bilməmişik. Böyük oğlan internetdə saytlara baxır, axtarış etmək istəyir. Bu anda anası onu uzaqlaşdırır. Onlar üçün çox çətindir”.
Q.Hüseynli bir müddət sonra böyük uşağa atasının həlak olması barədə məlumat veriləcəyini deyib: “Çox güman ki, psixoloqa da aparılacaq. Bəlkə psixoloq yaxşı məsləhətlər verdi və ona əməl etdik. Pilotun yoxluğu getdikcə daha çox hiss olunur. İlk vaxtlar yoldaşı bu qədər əzab çəkmirdi, indi daha çox onu xatırlayır”.
Xatırladaq ki, iyulun 24-də saat 22.00 radələrində plana uyğun olaraq gecə vaxtı təlim-məşq uçuşları keçirən Hərbi Hava Qüvvələrinin MiQ-29 təyyarəsi ilə qəflətən rabitə əlaqəsi kəsilib və aviasiya vasitəsi radarlardan itib. Təyyarə Xəzər dənizinə düşüb. Qəza nəticəsində təyyarənin pilotu, polkovnik-leytenant Rəşad Atakişiyev həlak olub. 34 yaşında dünyasını dəyişən hərbi pilotun nəşi avqustun 21-də torpağa tapşırılıb. (Azvision.az)
