Şəhidliyin, qəhrəmanlığın məkanı, zamanı olmur – MƏQALƏ
Vətən qeyrət qalasıdır. Bu qalanı ucalıq mərtəbəsində tutan, ruhunun ucalığı bilən, sal qaya kimi düşmənin qarşısını kəsən oğullardır. Biri-birinə arxa-dayaq olan bu qayaların ürəkləri Vətən sevgisiylə, Vətən eşqi ilə döyünür.
Onlar Vətənimizin işıqlı sabahları, aydın səmaları üçün döyüşür, Vətən üçün can əsirgəmir, şəhadətləriylə ölümü ucaldıb ölümsüzlüyə, əbədiyyətə qovuşurlar.
Şəhidliyin, qəhrəmanlığın məkanı, zamanı olmur. Şəhidlər xalqın kimliyini, mənliyini qoruyub işıqlı sabahımıza boylanan azadlıq pöhrələri, yüksəlişə, ucalığa can atan könül dünyamızdır. Heç kimə bənzəmədən öz ömrünü ömürlərə – Vətənə bağışlayan oğullardı qəhrəmanlar.
Müasir vətənimizin qeyrət salnaməsidir-Mübariz İbrahimov.Yurd haqqını öz canından artıq bilən və doğma torpağımız uğrunda öz cavan ömrünü fəda edən olumsuz qəhrəmandır O.
Xalqımızın şanlı tarixi çoxlu sayda qəhrəmanlıq səhifələri ilə zəngindir. Şərait qəhrəmanlar yaradır, qəhrəmanlar isə tarix. Vətən sevgisiylə bizlərin qüruru, vüqarı, fəxri, ölməzliyi, örnəyi olan Mübariz İbrahimov kimi.
Heç kəs anadan qəhrəman doğulmur. Onu yaşadığı zaman, ətrafında cərəyan edən hadisələr, malik olduğu xarakter, ən başlıcası, xalqın ruhunun can ortağı olan ruhu yetişdirir. Mübariz Qarabağ müharibəsi ilə həmyaşıd idi. Ağlı kəsəndən, dili söz tutandan evdə, məktəbdə, televiziya verilişlərində erməni vəhşilikləri barədə çox görüb eşitmişdi. 4 yaşındaydı Xocalı faciəsi baş verəndə.
Məktəbdə Xocalı faciəsindən inşa yazanda, tədbirlərdə iştirak edəndə, televiziyada erməni vəhşiliklərini əks etdirən süjetlərə baxanda onunla həmyaşıd olan uşaqlara, qadınlara, ağsaqqallara, ağbirçəklərə yalnız Azərbaycan türkü olduğuna görə erməni cəlladlarının işgəncələr verərək öldürdüklərini görəndə, tərtəmiz ürəyinə göstərəcəyi qəhrəmanlığın ilk sətirləri yazılırdı.
Mübariz ona qoyulan adı doğrultdu. Adının möhtəşəmliyini, Vətənin, torpağın yaddaşına yazılan əbədiyaşarları zamanın küləkləri, tufanları silə bilməyəcək. Mübariz üçün Vətən hər şeydən üstün, hər şeydən qiymətli, hər şeydən uca idi. Hər dəfə sevgidən söz düşəndə deyərdi ki, mənim vurğunu olduğum Vətəndir! Vətən torpağı düşmən tapdağındadır, nəfəsiniz işğalı sona yetirməlidir.
Hərənin öz yolu var deyirdi. “Mən yolumu seçmişəm. Düşməndən ürəyimcə qisas almasam, elə bilərəm ki, Allahım da, valideynlərim də məni bağışlamaz. Vətənin azadlığı üçün qurban lazımdırsa, biri mən…”
Şəhidlik yenilməzlik əlamətidir. Mübariz işğal altında olan Vətən torpaqlarımızın, boynu bükük dağlarımızın, məlul baxışlı meşələrimizin, dili kilidlənmiş bulaqlarımızın həsrətini çəkirdi. Dözə bilmirdi bunlara. Sözünün əvvəli də, axırı da Vətən idi. Vətəni qorumağı, şəhid olmağı bir övlad kimi şərəf borcu sayırdı.
Vətən uğrunda canından keçənlər ölmür. Şəhidlər əbədiyaşardır. Onlar Vətən uğrunda vuruşdular, Vətən naminə canlarından keçməyi bacardılar. Torpağı vətənləşdirən onlardır. Türk şairi Mithat Cemal Kuntay bunu necə dolğun ifadə edib:
Bayraqları bayraq yapan üstündəki qandır,
Torpaq, uğrunda ölən varsa, Vətəndir!
Azərbaycanın Milli Qəhrəmanı Mübariz İbrahimovun şərəfinə hazırlanmış bu antologiyada böyük türk dünyasının bütün bölgələrindən olan yazarların poetik nümunələri yer alıb.Türkiyə,Azərbaycan,Güney Azərbaycan,
Qazax, Axiska, Kumik, Qırğız, Qaşqay, Özbəkistan, Türkməneli, Uyğur, Tatarıstan, Başqırd, Noqay və s. türk ellərinin yazarları bu böyük TÜRK OĞLUNUN qəhrəmanlığı şərəfinə ulu türk ruhunun poetik düşüncələrini səmimi notlarla və sevgi ilə sərgiləmişlər bu antologiyada.
Fərəhli haldır ki, Milli Qəhrəmanımız Mübariz İbrahimovun böyük sücaətinə ədəbi-bədii abidə kimi ucaldılan bu kitabdakı bədii nümunələrin toplanmasında Türkiyədə yaşayan hörmətli tarixçi Cavid Mövsünlü və Turan sevdalı yazar-şair Yahya Azəroğlu əmək sərf etmişdir.
Bu dəyərli antologiyanın çap olunmasının səbəbkarı,Milli Qəhrəmanın soykökündən olan Seyidağa Seyid Sadıxdır.Xalqımızın və vətənimizin hünər salnaməsini yazan,milli ruhumuzun qeyrət ocağını alovlandıran böyük türk dünyasının əbədiyaşar oğlu,Milli Qəhrəmanımız Mübariz İbrahimova tükənməz ehtiramın təcəssümü olan bu kitabı vətənpərvərlik dastanı kimi səciyyələndirmək olar.
Mübariz İbrahimov Azərbaycan əsgərinin qəhrəmanlıq simvoludur….O,baharı çox sevərmiş…. İyirmi iki bahar yaşadı. Şəhidlik zirvəsinə qovuşanda da ömrünün bahar çağıydı. İllər ötəcək, Mübariz bu yaşda,ömrünün baharında qalacaq…
Hər gün onun qartal baxışları uca şəhidlik zirvəsindən QƏLƏBƏ YOLUNA boylanır və bu YOL gəlir!
Sona Abbəsəliqızı – Manera.az
