SHXÇDX şəhid ailələri ziyarət olundu - FOTO
Səfərbərlik və Hərbi Xidmətə Çağırış üzrə Dövlət Xidməti (SHXÇDX) Milli qəhrəmanların, veteranların, QHT rəhbərlərinin, baş redaktorların iştirakı ilə 31 dekabr – Dünya Azərbaycanlılarının Həmrəylik Günü və eləcə də Yeni il bayramı münasibətilə respublikanın bütün şəhər və rayonlarını əhatə etməklə bir qrup şəhid ailəsinə bayram təbrikləri və sovqatlar çatdırıb.
Xidmətdən Rakus.az-a bildiriblər ki, Səfərbərlik və Hərbi Xidmətə Çağırış üzrə Dövlət Xidmətinin rəisi, general-leytenant Arzu Rəhimov, Azərbaycan Gənclər Fondunun icraçı direktoru Fərid Cəfərov, Milli Məclisin deputatı Flora Qasımova, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının üzvü Emin Həsənli Səbail rayonunda şəhid İsrail Məmmədovun, Yasamal rayonunda Rəfail Hüseynovun, Nəsimi rayonunda Şirvan Əhmədovun və Nərimanov rayonunda Fərman Xamoyevin ailəsinə baş çəkib, bayram münasibətilə təbrik ediblər.
Xatırladaq ki, Prezident İlham Əliyevin rəhbərliyi ilə şəhid ailələrinin, müharibə veteranlarının, əlillərin sosial müdafiəsinin gücləndirilməsi istiqamətində reallaşdırılan siyasətə müvafiq olaraq Səfərbərlik və Hərbi Xidmətə Çağırış üzrə Dövlət Xidməti bu sahədə müxtəlif layihələr həyata keçirir.
Görüşdə şəhid ailələri onlara göstərilən diqqət və qayğıya görə dövlətimizin başçısı İlham Əliyevə və Azərbaycanın Birinci vitse-prezidenti Mehriban xanım Əliyevaya dərin minnətdarlıqlarını bildiriblər.
SHXÇDX-nin yerli idarə, şöbə və bölmələri tərəfindən bayram münasibətilə şəhid ailələrini ziyarət və sovqatların çatdırılması həyata keçirilib.
