Şimalda kütləvi kəpənək uçuşu müşahidə edilir
Mayın 30-dan başlayaraq şimal rayonlarının ərazisində geniş arealda kəpənəklərin kütləvi uçuşu müşahidə olunur.
Rakus.az-ın bölgə müxbiri xəbər verir ki, küllük kəpənəkləri adlanan zərərvericilər Xəzər dənizi istiqamətindən Xaçmaz, Quba, Şabran rayonları ərazisinə uçurlar.
Xaçmaz rayon Bitki Mühafizə Mərkəzinin rəisi Əkbər Ceyranov bildirib ki, bu kəpənəklər əsasən şeytanqanqallı, gicitkən, türpəng kimi alaq otları bitən sahələrdə (yol, meşə və əkin sahələrinin kənarlarında, çəmənliklərdə, yamaclarda, su hövzələri yaxınlığında və s.) qidalanaraq geniş ərazilərdə yayılır.
Yaxşı miqrasiya etmək qabiliyyətinə malik olan kəpənəklər miqrasiyadan əvvəl birləşərək böyük sürülər əmələ gətirirlər. Əsasən də iki istiqamətdə – yazda cənubdan şimala, payızda şimaldan cənuba miqrasiya edirlər.
Mütəxəssis küllük kəpənəklərinin əsasən alaq otları ilə qidalandığı üçün meyvə bağlarına, həmçinin taxıl və digər əkin sahələrinə zərər vurmayacağını deyib.
Əkbər Ceyranov əhaliyə müraciət edərək bildirir ki, əgər zərərvericilərin yaşıllıqlara və əkin sahələrinə ziyan vurması halları müşahidə olunarsa, müvafiq məsləhət almaq üçün rayon Bitki Mühafizəsi mərkəzlərinə müraciət etsinlər.
