Şirazi İbrahimov: “Doğulduğumuz torpaqları və ermənilərin vəhşiliklərini heç vaxt unutmadıq”
Onun sözlərinə görə, bu hay toplumu bizim ərazilərimizdə məskunlaşdığı bu iki əsr ərzində hər zaman xalqımıza bəla gətirib: “XX əsrdə dəfələrlə azərbaycanlılar deportasiya və sürgünə məruz qalıblar. Sonuncu da 1988-ci ildə Qərbi Azərbaycandan soydaşlarımız tarixi torpaqlarımızdan ermənilərin təzyiqi, silahlı hücumları nəticəsində didərgin salındılar”.
O, soydaşlarımızla bağlı bir neçə faktı qeyd edib: “1988-1991-ci illər qaçqınlığı zamanı Basarkeçər rayon Nərimanlı (Hüseynquluağalı) kəndində ermənilər tərəfindən Elləzov Həsən Nəbi oğlu, Elləzov Qara Nəbi oğlu, Aliyev Safalan Yunus oğlu, Həsənov İsgəndər Bayraməli oğlu fiziki təzyiqə məruz qalıblar. Cabbarov Teymur Yusif oğlu ermənilər tərəfindən döyülmüş sonra ölmüşdür. Seyid Yunus həm döyülüb, həm də gözlərinin qarşısında evi traktorla uçurulub. Mirzəyev Xəqani Zilfalı oğlunu öldürmək məqsədi ilə avtomobilinin üzərinə yük maşını sürmüşdülər möcüzə nəticəsində sağ qalmışdı. İsmayılov Müzəffər müəllim də fiziki təzyiqlərə məruz qalıb. Qəddar ermənilərin vəhşicəsinə döydüklərindən biri də Cabbarov Nürəddin (Dəddiş) olub”.
Tibb Universitetinin müəllimi doğma Vətənin heç vaxt unudulmadığını, qayıdış ümidinin itmədiyini söyləyib: “Biz oz tarixi torpaqlarımızdan qovulsaq da, Azərbaycanda bu illər ərzində yaşasaq da, bir an da olsa öz yurd yerlərimizi, doğulduğumuz torpaqlarımızı, həm də ermənilərin vəhşiliklərini unutmadıq. Onu da qeyd edim ki, Azərbaycan Respublikası 2020-ci ilin 44 günlük müharibə nəticəsində tarixi zəfərini qazandı. İşğal altında olan torpaqlarımız, Qarabağımız azad olundu. Artıq bundan sonra bizim Qərbi Azərbaycana qayıdışımız zərurətə çevrildi. Düzdür son 30 ildə dünyaya gələn nəsil o əraziləri görməyib. Lakin hər bir azərbaycanlının Qərbi Azərbaycan qəlbində, ruhunda yaşayır. Bütün bu amillər və Azərbaycan dövlətinin qüdrətlənməsi bizim Qərbi Azərbaycana qayıdışımıza yollar açır, imkanlar yaradır”.
Ş.İbrahimov Qərbi Azərbaycan İcmasının Basarkeçər rayonu Nərimanlı kənd icması haqqında da danışıb: “Nərimanlı kəndinin tarixindən, yetişdirdiyi şəxsiyyətlərdən, Azərbaycanın ərazi bütövlüyü və suverenliyinin təmin olunması üçün I Qarabağ müharibəsində, 44 günlük Vətən müharibəsində iştirak edən, öz sahəsində fəaliyyəti ilə dövlətçiliyin daha da güclənməsinə töhfə verən, böyük uğurlar qazanan soydaşlarımız var. I Qarabağ müharibəsində Nərimanlıdan 92 nəfər iştirak edib, onlardan 19-u şəhidlik zirvəsinə ucalıb, o cümlədən şəhid Şövqiyar Abdullayev Azərbaycanın Milli Qəhrəmanı adına layiq görülüb. Vətən müharibəsində isə 67 bizim həmyerlimiz iştirak edib, onlardan üç nəfər şəhid olub. Müharibədə iştirak edən qəhrəmanlıq nümunəsi göstərən Nərimanlı kənd sakinlərindən xeylisi müxtəlif orden və medallarla təltif olundular”.
İcma sədri sonda vurğulayıb ki, Göyçə mahalı, Basarkeçər rayonu, Nərimanlı kəndinin yetirmələri Azərbaycanın elm və təhsil sahəsində böyük töhfələr verirlər: “Hazırda Nərimanlının yetirməsi olan 1 akademik, 10 elmlər doktoru, professor, 34 fəlsəfə doktoru, 19 dissertant fəaliyyət göstərir. Bu gün biz bir çox sahələrdə geniş töhfələr veririk. Amma hər birimizin hədəfimiz o tarixi torpaqlarımıza, Qərbi Azərbaycana qayıtmaqdır. Biz bu istiqamətdə davamlı olaraq çalışırıq və ilahi ədalətə inanırıq”.
