“SOS” əməkdaşları şəhid ailələri ilə birlikdə Zəfər Parkını ziyarət edib - FOTO - VİDEO
Peşəkar mühafizə xidməti “Security Operation Services” Məhdud Məsuliyyətli Cəmiyyət (SOS) əməkdaşları şəhid ailə üzvləri ilə birlikdə 8 Noyabr – Zəfər Günü və 9 Noyabr – Dövlət Bayrağı Günü münasibətilə yeni açılmış “Zəfər” parkını ziyarət ediblər.
Rakus.az xəbər verir ki, “SOS” MMC-nin Şəxsi Heyəti və kollektivi mərd mübarizlərin əziz xatirələrinə hörmət əlaməti olaraq, şəhid ailə üzvləri ilə birgə üçrəngli bayrağımızla yürüş edərək, abidə önünə əklil və gül dəstələri qoyub, xatirə şəkilləri çəkdiriblər.
Sonra tədbir bayram süfrəsi arxasında davam edib.
“Security Operation Services” MMC-nin direktoru Anar Məmmədov tədbirə dəvət olunan qonaqları salamlayıb, iştirakçıları Zəfər bayramı münasibətilə təbrik edib. O, Azərbaycan Prezidenti, Silahlı Qüvvələrin Ali Baş Komandanı İlham Əliyevin rəhbərliyi altında Milli Ordu əsgərlərinin və şəhid olan vətəndaşlarımızın qəhrəmanlıq səlnaməsindən söz açıb, onların şücaətləri, qanı bahasına düşmən tapdağı altında qalan torpaqlarımızın işğalçılardan azad olunduğunu bildirib.
Onun sözlərinə görə, Vətənin ərazi bütövlüyü yolunda canlarını qurban vermiş şəhidlərin əziz xatirəsini hər zaman yad etmək hamımızın mənəvi borcudur.
Tədbirdə Respublika Veteranlar Təşkilatının sədri Cəlil Xəlilov tədbirin təşkilatçılarına təşəkkür edib, belə tədbirlərin əhəmiyyətindn söz açıb. Onun sözlərinə görə Azərbaycan Ordusunun yazdığı qəhrəmanlıq səlınaməsi, Şuşanın işqalçılardan azad olunması hünəri dünya üçün bir nümunədir və bir çox xarici ölkələr ölkəmizin hərbi təcrübəsindən faydalanmaq istəyir: “Bu, bizim üçün qürurvericidir və Ali Baş Komandanın uzaqgörən daxili və xarici siyasəti bu gün Azərbaycanımızda belə qələbələrin möhtəşəmliyi üçün əsas oldu. Prezident İlham Əliyevin dediyi kimi, Azərbaycan xalqı yenilməz və qəhrəman xalqdır. Bu qələbədə, Zəfər yolunda canlarını qurban vermiş hər bir oğul və qızımızın xidməti var. Onlar heç vaxt unudula bilməz və xalqımızın yaddaşında əbədi yaşayacaq. Təbii ki, onların adlarının əbədiləşdirilməsi daim dövlətimizin diqqət mərkəzindədir. Tanrıdan bütün şəhidlərimizə rəhmət diləyir, əsgərlərimizə, qazilərimizə və müzəffər Ali Baş komandana cansağlığı arzu edirik”.
Xətai rayonu Ağsaqqalar Şurasının sədri, şəhid atası Mürvət Rüstəmov Zəfər Günü münasibətilə şəhid ailələrinə göstərdiyi diqqətə görə SOS təşkilatının rəhbərliyinə minnətdarlığını bildirib, 2020-ci il sentyabrın 27-dən başlanan 44 günlük Vətən müharibəsinin qələbə ilə sonlanması üçün aparılan mübarizəni Azərbaycanın şərəfli tarixi adlandırıb, Ali Baş Komandana, qazilərə cansağlığı arzulayıb, Vətən yolunda canlarını qurban vermiş şəhidlərə Allahdan rəhmət diləyib.
O deyib ki, belə müqəddəs günlərdə şəhid ailələrinin unudulmaması bizlər üçün qürurvericidir: “Çox xoşbəxtik ki, övladlarımız yağı düşmənə qarşı Vətən yolunda canlarından keçərək biz valideynlərin başını uca ediblər. Təbii ki, şəhidsiz qələbə olmur. Hər zaman Prezidentimizin ətrafında sıx birləşərək dövlətimizin daha da güclənməsi yolunda əlimizdən gələni əsirgəməyəcəyik. Bir daha tədbirin təşkilatçılarına təşəkkür edirəm”.
Şəhid jurnalist Məhərrəm İbrahimovun qardaşı Əsgər İbrahimov Azərbayacnın tarixinə nəzər salıb və bildirib ki, hər bir işin uğuru onun qoyulan təməlindən asılıdır: “Ulu öndər Heydər Əliyev tərəfindən təməli qoyulan siyasi xətt və diplomatiya heç vaxt sarsılmadı. Çünki bu siyasət xalqın, millətin gələcəyinə hesablanmışdı. Bu gərgin və tarixi estafeti üzərinə götürən Prezident İlham Əliyev Ümummilli Liderin müdrik siyasi kursunu davam etdirərək Zəfərə çatdırdı. Onun adı bir sərkərdə kimi Azərbaycan tarixinə qızıl hərflərlə yazıldı. Bu, hər birimiz üçün iftixar mənbəyidir. Dövlət başçımızın Zəfər Parkının açılışında verdiyi mesajlardan revanşist qüvvələr və onların havadarları nəticə çıxarmalıdır. Çünki Azərbaycan ilə bundan sonra kimsə güc yolu ilə, hədə-qorxu ilə danışa bilməz”.
O, ölməzlik adı qazanmış şəhidlərin valideynlərinə, ailə üzvlərinə millətə, xalqa ləyaqətli övladlar bəxş etdikləri üçün təşəkkür edib və deyib ki, sizlər heç vaxt kədərli olmamalısınız: “Hər zaman başınızı uca tutmalısınız. Çünki əsrlər boyu parçalanan torpaqlarımızın bütövlüyünə məhz sizlərin övladlarının hünəri hesabına nail olundu. İstər birinci Qarabağ müharibəsində, istərsə də ikinci Qarabağ savaşında Azərbaycan jurnalistləri də hərbçilərimiz kimi fədakar fəaliyyəti ilə seçilib. Bu mənada 44 günlük Vətən müharibəsində şəhidlik zirvəsinə ucalanlar hər kəs üçün nümunədir”.
Tədbirdə Milli Qəhraman Riad Əhmədovun bacısı, Əməkdar İncəsənət Xadimi, bəstəkar Mehriban Əhmədovanın bəstələdiyi “Mənim Xalqım” mahnısı mərhum sənətkar Aygün Bəylərin ifasında səsləndirilib.
