Prezidentin sözçüsü Sediq Sediqqi deyib ki, Əfqanıstanın təhlükəsizlik qüvvəlri Kuduzun bəzi hissələrinə hücum qarşısını alıb: “Kunduz paytaxt Kabildən 200 kilometr uzaqda yerləşən strateji nöqtədir. Hücum tamamilə sülh danışıqlarının əleyhinədir. Militantlar mülki vətəndaşların arasında gizlənir”.
“Taliban” Kunduzda xəstəxananın nəzarətini ələ keçirib və döyüşdə iştirak edən hər iki tərəf arasında ölənlər olub”. Bu barədə valiayət şurasını üzvü Qulam Rəbani The Associated Press-ə bildirib.
Müdafiə Nazirliyinin sözçüsü Ruhullah Əhmədzai müxbirlərə deyib ki, militantlar hospitaldakı pasientləri girov götürüb: “Biz asanlıqda hücum edə bilərik, amma mülki vətəndaşlar arasında itkilərin olmasını istəmirik. Hava hücum nəticəsində 16 “Taliban” döyüşçüsü öldürülüb, lakin o, mülki vətəndaşlar və ya Əfqanıstanın təhlükəsizlik qüvvələri arasında tələfatın olduğunu bildirməyib.
Vilayət polis idarəsinin rəisi Səyid Sərvər Hüsseyni deyib ki, “Taliban” gecə şəhərin bir neçə nöqtəsindən “kütləvi hücumlar”edib.
NATO-nun Əfqanıstandakı missiyasının rəsmiləri qüvvələrinin hücuma cavab verib-vermədiyini bildirməyib.
ABŞ nümayəndəsi Zalmay Xəlilzad Qətərdə “Taliban” liderləri ilə 18 ildir davam edən müharibəyə son qoymaq üçün danışıqlar apardığı vaxt belə, qrup mülki vətəndaşlar və təhlükəsizlik qüvvələrinə hücumlarını davam etdirir.
“Taliban”ın sözçüsü deyib ki, danışıqlar şənbə günü davam edib. Hər iki tərəf son günlərdə razılıq əldə etməyə yaxın olduğuna işarə edib. Əfqan prezidentinin sözçüsü deyib ki, Xəlilzad höküməti razılığın təfərruatları barədə məlumatlandırmaq üçün Kabilə səfər edəcək.
Daxili işlər nazirinin sabiq müavini, təhlilçi Mirzə Məhəmməd Yatmandin sözlərinə görə, Kunduza hücum Talibanın Qətərdə müzakirə olunan atəşkəsin əldə olunmasında marağının olmadığını göstərir.
ABŞ Prezidenti Donald Tramp bir müddət əvvəl deyib ki, ABŞ Əfqanıstandakı amerikalı əsgərlərin sayını 14,000-dən 8,600-ə endirməyi planlaşdırır. O, bunu ABŞ nümayəndəsi Talibanla 18 ildir davam edən müharibəyə həll yolu tapmaqla bağlı danışıqarı davam etdirdiyi vaxt söyləyib. Prezident bildirib ki, ABŞ razılıq əldə etməyə “yaxındır”, amma razılığın nəticəsi hələ ki, qeyi-müəyyəndir.
“Kim bilir, bu baş verə də bilər, verməyə də”,- Tramp Fox News Radiosunun “The Brian Kilmeade” şousunda söyləyib.
D.Tramp qoşunların nə zaman çıxarılacağını bildirməyib. Pentaqon orada olan 14 min qoşunun yarısını ölkədən çıxarmaq planları hazırlayır, lakin “Taliban” ABŞ və NATO-nun bütün qüvvələrinin ölkəni tərk etməsini istəyir.
“Biz qoşunun sayını 8600-dək endirəcəyik və daha sonrakı addımı müəyyən edəcəyik”,- Tramp deyib və əlavə edib ki, ABŞ-ın Əfqanıstanda “yüksək kəşfiyyat” mövcudluğu olacaq.
D.Tramp “Taliban”ın 11 sentyabr hücumlarına görə məsuliyyət daşıyan “Əl-Qaidə” şəbəkəsinin üzvlərini sığınacaqla təmin edən Əfqanıstanı “Terrorun Harvard Universiteti” adlandırıb.
Əgər terror qrupları bir daha Əfqanıstandan Amerikaya hücum etsə “biz onların daha öncə görmədikləri güvvə ilə geri dönəcəyik. Amma mən bunun baş verəcəyini gözləmirəm”, – o vurğulayıb.
ABŞ-ın yüksək rütbəli ordu zabiti deyib ki, ABŞ qoşunlarının Əfqanıstandan tamamilə çıxarılmasını müzakirə etmək hələ çox tezdir. Birgə Qərargahlar rəisi general Cozef Danford Pentaqonda müxbirlərə bildirib ki, ABŞ-ın “Taliban”la əldə edəcəyi hər hansı razılıq Əfqanıstanda təhlükəsizlik şərtlərinə əsaslanacaq: “Əfqanıstan qüvvələri hələ ki, müttəfiq qüvvələrin yardımı olmadan ölkəni müdafiə edə bilmir”.
