Tamam Cəfərova seçicilərlə görüşlərini davam etdirir - FOTO
Bu il sentyabrın 1-də VII çağırış növbədənkənar parlament seçkiləri ilə əlaqədar 88 saylı Şamaxı rayonundan deputatlığa namizəd Tamam Cəfərova təbliğat-təşviqat kampaniyası çərçivəsində seçicilərlə görüşlərini davam etdirir.
Rakus.az xəbər verir ki, T.Cəfərova avqustun 19-da rayonun Çuxuryurd kəndində Aprel döyüşləri şəhidi Samir Ziyəddin oğlu Kaçayevin ailə üzvləri ilə birlikdə onun məzarını ziyarət edərək, xatirəsini yad edib.
O, Vətən yolunda canlarını qurban vermiş şəhidimizə Allahdan rəhmət, ailəsinə səbr diləyib.
xxx
Həmin gün deputatlığa namizəd Tamam Cəfərova rayonun Çuxuryurd, Dədəgünəş, Birinci və İkinci Çağan kəndlərində seçicilərlə görüşü olub.
Görüşlərdə çıxış edən T.Cəfərova ötən dövrdəki fəaliyyəti, vətəndaşların müraciətləri ilə əlaqədar müvafiq qurumlara edilən müraciətlər barədə ətraflı məlumat verib, yeni seçki platformasını seçicilərin nəzərinə çatdırıb.
Seçicilər onları maraqlandıran və narahat edən problemləri namizədin diqqətinə çatdırıb, mövcud problemlərin həlli istiqamətində birgə müzakirə aparılıb.
Sonda Tamam Cəfərova kənd sakinlərinə göstərdikləri səmimi, xoş münasibətə və qəti dövlətçilik mövqelərinə görə minnətdarlığını bildirib, seçiciləri parlament seçkilərində fəal iştirak etməyə və ən layiqli namizədə səs verməyə çağırıb.
